"Илыш мундыра" рубрик, 2013 ий, Шыжа тылзын 8-ше кечыже

Илыш мундыра

Статьян авторжо Алевтина Таныгина

Кажне айдеме илыме курымыштыжо шке пӱрымаш мундыражым пӱтыра. Кӧн тудо могай лектеш. Иктын шӱртыжӧ йытыран возеш, весын кукталтеш, кумшын кӱрылтеш да кылдыш дене темеш, нылымшын… Тыге ме койыш-шоктышна, ыштыш-кучышна, пашана, шонымына, кутырымына  дене пӱрымашнам вӱдылына. Кажныже тӱрлӧ улына. Икте порылык дене ила гын, весе деч осал шомак веле йоҥга, улыт тугай еҥ-влакат, кӧ весын погыжым шкаланже налаш ваҥен гына коштеш, оксалан опкынланыше-шамыч кызыт шукем толыт… Кузе осал койыш деч кораҥаш, языкым ыштыме деч лӱдаш тӱҥалаш да порылык дене илаш тунемаш? Лач нине йодышым «Илыш мундыра» лаштыкыштына лончылаш тӱҥалына. Ты мутланымашыш теат ушныза, пагалыме лудшына-влак. Йодышдам вучен кодына.

batuska1Йӧратымаш нерген

Семёновко селаште верланыше Рождество Пресвятой Богородицы храмын клирикше, иерей Димитрий Иванов таче мыланна христиан йӧратымаш нерген умылтара.

«Йӧратымаш» шомакын умылымашыже моткоч кумда, келге. Эн ончык аван йӧратымашыжым шындыман, вет тудо шочшым уло шӱм-чонжо дене йӧрата, а вашешыже нимом огеш вучо, огеш нал. Аван йӧратымашыжым моло йӧратымашлан пример шотеш налман. У Завет почеш, воктенсе еҥым йӧратымашак Юмо дек корным почеш. «… Воктенсе улшо изатым от йӧрате гын, кузе Юмыжым йӧраташ тӱҥалат, вет тудыжым  отат уж». (Ин 4,20) Воктенс еҥ-влакым йӧратыме умылымашыш эн ончыч родо-тукымым йӧратымаш пура, но ты шижмаш Юмым йӧратымым ӱмылтышаш огыл.

Таче йӧратымаш эгоизм дене кылдалтын. Эн тӱҥжӧ, рӱдыжӧ – «Мый»,  да тудын йыр моло событий пӧрдеш. Йӧратымаш шотышто ойлаш гын, тачысе саманыште шкаланышт пайдам налмым еҥ-влак эн ончык шындат. Пӧръеҥ ден ӱдырамаш кокласе йӧратымашым, вате ден марийла мален, ракатым налмаш дене веле кылдат. Тыгай языкан йӧратымашым мыланна тачысе саман темла. «Йӧратыме айдеме» шомак пелен «партнёр» мут пурен шинчын. «Партнёр» шомак бизнес тӱня гыч толын. Деловой сферыште партнёр тугай еҥ, кудыж дене иктаж проектым пырля ыштат. А тыгай кыл лач шкалан пайдам налаш ышталтеш. Бизнес окса дене кылдалтын гын, йӧратымашыште ракатым налмаш веле тӱҥ верыш лектеш. Партнёр кыл ракатым огеш кондо гын, тунамак кӱрылтеш. А христиан йӧратымаш тыгай огыл. Юмо еҥ деч  иктаж-мом налаш огыл, а шукырак сайым ышташ туныкта. Тыште поянлыклан, ракатлан вер уке. Шкенам шке кузе аклена, йӧратена, еҥ декат тыгак лийман манын, Юмо туныкта.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: