"Шинчымаш кугорнышто" рубрик, 2013 ий, Шыжа тылзын 8-ше кечыже

Туныктышо дене вашлийын кутыралташ ида вожыл

Статьян авторжо Алевтина Таныгина

У тунемме ий тӱҥалын, йоча-влак парт коклаш шинчыныт, а туныктышо-шамыч шинчымашым пуаш ямдылалтыныт. Нунылан 1 сентябрь у ий гаяк. Вет икшыве-влак кеҥежым кушкыныт, изиш вашталтыныт, у ончалтыш дене учительым ончат, у шинчымашым вучат.

SkolТеве кодшо арнян Советский район Михайловко селаш мийышна,  школышкат пурыде ышна код.

Школ полат волгыдо, ару, икшыве-влак чылан йытыран чиеныт, коридор дене рыҥ ошкыл колтат. Айдемылан ончык каяш, сеҥымашыш шуаш чиемат изин огыл полша манын, арам огыт ойло улмаш.

Ты школышто индешымше класс марте туныктат, кызыт 90 тунемше парт коклаш шинчын. Школ илыш дене тӧр ошкылеш, йоча-влаклан шинчымашым налаш, тӱрлӧ шӧрын гыч шуаралташ чыла йӧн уло.

Мемнам тренажёр зал куандарыш. Тыште йоча-влак яра жапыште капкылыштым пеҥгыдемдат. Икшыве парт коклаште кужу жап шинчен огеш керт, тудын тӧрштылмыжӧ, куржталмыже шуэш, поснак рвезе йочан. Тренажёр залыште, чогашылым нойыктарымек, кучедалмыже, шӱкедылмыже огеш шу. Йоча-влак физкультур дене таҥлалтыт гын, осал койыш-шоктышан огыт лий. Но тыгодым мӧҥгыштӧ ача-ава-влак шочшыштын шӱм-чонышкышт порылыкын нӧшмыжым «шынден» моштышаш улыт. Еҥым пагалаш, аклаш, марий манмыла, кугурак деч лӱдаш, изиракым чаманаш йоча ешыште тунемшаш. Тиде – ача-аван порысышт. Ешыште аваже еҥым игылт шинча, а ача пошкудо дене кредал толеш гын, шочшыжо могай лиеш? Тиде йодышлан вашешташ ача-авалан кодена.

Кызыт школлаште пӧръеҥ туныктышо шуэнрак вашлиялтеш, а теве Михайловко школышто куд пӧръеҥ туныктышо тырша. Физкультур дене туныктышо, тренажёр залын озаже Ю.А.Степанов, тудак руш йылме дек шӱмаҥда, музыкым туныктышо В.В.Анисимов изи огыл стажан улыт.

А теве нылле ий школышто туныктышо А.Г.Никитин нерген шукырак каласкалыме шуэш. Икымше ончалмаште кугу опытан туныктышо ончылно вожылал колтет, тунамак кугу пагалымаш лектеш. Кӱкшӧ капкылан, пеҥгыде койышан, поро шинчаончалтышан туныктышо кеч-могай икшывым сайын тунемаш, шкем шот дене кучаш тарата. Туныктышо тыгаяк лийшаш: тӱжвал сынже, койыш-шоктышыжо да шинчаончалтышыже йочан пагалымашыжым лукшаш. Тыгай туныктышо-влак таче моткоч шагал кодыныт, нуным шӧртньӧ падыраш дене таҥастарыман, очыни.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: