Алевтина Николаевна Таныгина (Васильева)

"Кугарня" газет журналист, Алевтина Николаевна Таныгина (Васильева)Морко район, Унчо ялеш шочын-кушкын. Школышто тунеммыж годымак «Пионер йӱк» журнал, «Ямде лий» ден «Кугарня» газет-влакын чулым юнкоржо лийын. Икымше «Патыр куэ» почеламутшо 1988 ийыште «Пионер йӱк» журналеш савыкталтын. Школ деч вара (1994 ий) вигак «Кугарня» газет редакцийын коллективышкыже ушнен. 1995 ийыште Марий кугыжаныш университетын историй да филологий факультетышкыже тунемаш пурен. Студент пагытыштат газет дене кылже йомын огыл, кажне кеҥежым штатный пашаеҥ-влакым отпуск жапыштышт алмаштен шоген, тӱрлӧ темылан статья-шамычым возкален. Тыгодымак прозо йӧршан почеламутым серен. 1999 ийыште савыкталтше «Венок Пушкину» сборникыш прозо дене возымо кум лирический почеламутшо пурен. Чыла возымыжым чумырен, 2004 ийыште «Чоныштем — йӧратымаш» лӱман книгам луктын. Сборникыш прозо дене возымо 15 почеламутшо ден «Шола кидысе шӧртньӧ шергаш»ойлымашыже пуреныт.

Вуз деч вара уэш «Кугарня» газет редакцийыште пашам ышташ тӱҥалын. Тӱҥ шотышто социальный ден ял озанлык йодышым рашемден шоген. Икмыняр у проект-влакым шонен луктын. Тиде самырык ача-авалан еш илышыште да йочам воспитатлымаште лекше тургыжландарыше йодышым рашемден шогышо «Еш» мландышарыште» лаштык.  Йошкар-Оласе адвокат-влак коллегий дене пырля «Правовой школ» лаштыкым ятыр ий ямдылен шоген. Кушкын толшо тукымым шке правам палаш да неле ситуаций гыч чын лектын мошташ туныктен. Тыгак спорт дек шӱмаҥден шогышо «Олимп» лаштыкым савыкташ тӱҥалын. Вара «Тӱрлӧ тӱсан Марий кундемна» лаштыкым шонен луктын.

Марий Эл Республикысе ял озанлык ден продовольствий министерствын, Тӱвыра, печать да национальность паша шотышто министерствын Чап грамотшо дене палемдалтын. Журналист-влакын кечышт вашеш кажне ийын эртаралтше конкурсышто кок ий почела (2004 ден 2005) дипломант лийын.

2009 ийыште Алевтина Николаевнан пашажым аклен, Марий Элын Президентше Л.И.Маркелов Благодарностьым кучыктен. 2010 ийыште Марий Эл Республикын Олык Ипай лӱмеш Кугыжаныш молодежный премийын лауреатше лӱым пуэныт.

2011 сентябрь — 2013 февраль жапыште Марий книга издательствыште редакторлан тыршен. Индеш книгам редактироватлен. Тиде А. Тимиркаевын «Валкиза», «Эрвий» альманах кок выпуск, Ирина Черныхын «Тыгай йӧратымаш…», П.Апакаев «Йолташ-влак коклаште», Яков Егоров «Ир шоган», марий калыкын йӧратыме артистше Виктор Бурлаков нерген сылне книгам да молат. Шкежат тиде жапыште «Унчын уста еҥже» серий дене поэт, журналист Василий Миронов нерген «Мирон Васлий» книгам савыктен. Книгаш поэтын почеламутшым, тудын нерген статьям, серышым, шарнымаш-влакым пуртен. Морко район Унчо селаште шочын-кушшо да ятыр ий «Морко мланде» газетыште пашам ыштыше журналист, поэт нерген сай книга лектын.

2013 ий мартыште Алевтина Николаевна уэш «Кугарня» газетыш толеш. Тыште тӱҥ титакше — Алевтинан журналист пашам чот йӧратымашыже! У лаштык-влакым шонен луктын. Марий кундемыште верланыше черке, храм да священник-влак нерген «Святой черке пелен» да марий йынйӱлалан да онаеҥ-шамычлан пӧлеклалтше «Кугезе сугынь» лаштык-влак. «Илыш мундыра» страницым уэмден.

2014 ий январьыште журналист-влак коклаште эртаралтше республиканский конкурсышто «За верность национальным традициям» номинацийыште сеҥышыш лектын.