"Святой черке дене пырля" рубрик, 2014 ий, Шорыкйол тылзын 30-шо кечыже

Еш – тиде изи черке

Статьян авторжо Алевтина Таныгина

Кужэҥерысе Ново-Никольский храмын бачышкаже, Вячеслав ача, марий еҥ-влак черкыш языкым касараш мият гын, марла ойлыкта. Тидыже мемнам моткоч куандарыш да Вячеслав ача дене вашлийын кутыраш кумыл лекте. Тыге ме Кужэҥерыш кудална.

Otes- Вячеслав ача, ме колынна, Те языкым касараш толшо-влак дене марла кутыреда?

- Кова-коча-влак языкым касараш толмышт годым шӱм-чон кӧргӧ ойгыштым рушла мучаш марте раш почын огыт керт. Чылажат ик кова деч тӱҥале. Языкым касарымыж годым рушла ойлен колтен огеш керт, но кутырынежак. Вара мый чытен шым керт: «Тугеже айда марла кутыро», – маньым. Кова, кумылаҥын, уло шӱм-чонжым почо. Варажым кова ӱмбак ончен куаненам, шкенжым туге куштылгын шижын, туддеч пиалан айдеме тӱняштыжат иктат уке шонет. Эрлашыжым эше толын таум каласен кайыш. «Чонемлан моткоч куштылго лие, языкем касарымекем,  ӱмбачем пуйто кӱм налын кудалтышт». Шӱм-чоным почын кутырымаш, чынжымак, айдемым яндарештара.

- Вячеслав ача, самырык-влак венчаялтыт мо? Але модылан кӧра веле толыт?

- Кок-кум ий ончыч венчаялтме модо толкын лийын ыле. А кызыт венчаялтмым серьезнынрак ончат, шагалынрак толыт. Ӱдыр-каче дене сӱан деч ончыч кутырен шинчыме годым чылажат рашемеш. Ӱшанат мо нуно мучаш марте икте-весыштлан, кеч-мо лиеш гынат, ӱмыр мучко ваш-ваш эҥертен, полшен илен кертыт мо? Тиде – кугу йодыш. Вет еш илыш – тиде изи черке. Библийыште тыге возымо: «Вате-влак тек шке марийыштым Господьым колыштмо семынак колыштыт, вет кузе Христос Черкылан вуй улеш, да Тудак Черкын Утарышыже, тугак марият ватылан вуй улеш. Кузе Черке Христосым колыштеш, тугак вате-влакат шке марийыштым чыла шотыштат колыштшаш улыт…» Ончыкылык ватылан тыге ойлет да моткоч ӧпкелалтеш,  Евангелийыште ойлымым мучаш марте умылен огыт шукто. Вате – марийжын полышкалышыже.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: