"Изи тӱня, кугу тӱня" рубрик, 2014 ий, Шорыкйол тылзын 29-ше кечыже

Кажне ӱстембалне мӱй лийже!

Статьян авторжо Алевтина Таныгина

Мӱкшым «юмын кайык» маныт, а мӱй – чыла чер деч эм. Мӱкш лым лийде эре пашам ышта, ик пеледыш гыч весыш пырчын-пырчын нектарым поген чоҥештылеш. Шоналташ гын, ик изи совла мӱйлан изи мӱкшлан мыняр гана омарташ чоҥештылашыже логалеш?

MedШуко. А ме тидым огынат шоналте. Кеҥежым мӱкш чоҥештылмылан сырена. Сыраш огеш кӱл, куаныман,  пистым шукырак шындыман. Тунам мӱй шуко лиеш.

Мӱйым изижланат-кугужланат кочман. Тудо вий-куатым пуа. Мӱйын составше тыгай: фруктозо- 36%, глюкозо – 32%, сахарозо – 2%, мальтозо -8%, вӱд – 20%. Углеводлан поян улмыжлан кӧра мӱй виян энергетический кочкышлан шотлалтеш. Сандене тудым физический пашам ыштыше еҥ, спортсмен-влаклан шукырак кочман. Йоча ден шоҥгыеҥ-влаклан пукшыман. Сакыр олмеш мӱйым кучылтман. Тунам эре таза лият.

Мӱкшызӧ-влак шке сомылыштым сайын палат. Могай мӱй кузе лиймым умылтарен кертыт, но пытартыш жапыште, оксам шуко ыштен налаш манын, тӱрлӧ шоя информацийым кучылтыт. Марий кундемысе мӱкшызӧ-влак, конешне, тыгай огытыл. Нуно мӱйым ужалаш лабораторий анализым эртымек веле лектыт. Адакшым Марий Элысе мӱкшызӧ-влакын ушемышт сайын пашам ышта. Кызыт тудын вуйлатышыже В.Ф.Южаков мӱй экспертизылан кугу тӱткышым ойыра.

Комментарий-влак: Тиде страницыште комментарийым кодаш гоеш лий.