"Илыш йогын" рубрик, 2014 ий, Шорыкйол тылзын 30-шо кечыже

Пиал оксаште веле огыл…

Статьян авторжо Алевтина Таныгина

Ура шӱм-чонан, чытамсыр койыш-шоктышан, порылыкым чапландарыше, шоям чытен кертдыме, шочмо кундемжым, калыкшым да пӱртӱсым чот йӧратыше айдеме тӱшка калык коклаште вашке палдырна, поро пашаж дене сай  шарнымашым кода. Лач тыгай еҥ Советский районысо Михайловко кундемыште ила,  тиде – Г.И.Мичеев.

MiseevГеоргий Иванович «Кугарня» газетнан поро йолташыже, уке-уке да редакцийыш толын, тидын-тудын нерген возаш кӱлеш манын, тугай статьян лудшына-влаклан кӱлешлыкшым рашемден, у материалым сераш мемнам кумылаҥден кая. Теве кеҥежым тудын кажне кечын манме гай йыгыжтарен йыҥгыртымыжлан кӧрак чодыраш лектын кайышна.  81 ияш писатель А.Ф.Федоров дене коктын кече мучко мемнам пич чодыраште йолын коштыктышт. Пӱртӱсын сылнылыкшым, ойыртемалтше вершӧрым, эм шудо-влакым ончыктен каласкалышт, чодырам руымо эҥгекым, пӱртӱсын орланымыжымат рашемдышт. Тыге газетыштына «Мом шонен шога шоҥго шоло?» серий савыкталте. Вара  Михайловко кундемыш, тусо школыш ӱжын ыле, сылне паркым ыштымым палдарыш да ты селаште илыше ойыртемалтше лесник еш нерген статьям газетышкына савыкташ амалым пыштыш.

Тидын нерген возаш кӱлеш, тудын нерген возаш кӱлеш манын,  коштшо еҥлан паша шыгыр годым коклан ӧпкеленат колтет, но шоналтет да тыге рашемеш: могай молодец тиде айдеме! Тыгай торжаҥше, оксам гына эн ончык шындыме саманыште тудо шӱм-чонжым арумак арален коден, вуй ушыжо кӱсеным оварташ огеш шоно. Тыгай еҥ-влак але коклаштына илат-шӱлат, нунылан  кӧра эше порылык йӧршынак йомын огыл, нунын чытамсыр койышыштлан кӧра але моторлык тӱняште ила, вет тӱням пытымаш деч моторлык утарен шога.

Георгий Иванович таче, йӧршеш манме гай, аклалтдыме сомылым шуктен ила: шке кундемысе калыкше нерген книгам воза да, изин-изин оксам поген, савыкташ тырша. Шоналташ гын, кӧлан кӱлеш кызыт пытыше ял да тушто илыше калык, Афганистанысе, Чечня сарлаште лийше рвезе-влак, Кугу Отечественный сар жапыште колхозышто пашам ыштыше да таче марте але, Юмылан тау, илыше ветеран-влак нерген книгам возаш? Тидын нерген кызыт кугун огытат шоналте, тидын дене кылдалтше иктаж-мом ыштат гынат, ӱмбачын веле, лӱмжылан. Калык таче шӱм-чон поянлык нерген огыл тургыжлана… А Георгий Иванович чоным тургыжландарыше воктеч шып эртен каен огеш керт.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: