"Илыш мундыра" рубрик, 2014 ий, Пургыж тылзын 14-ше кечыже

Мо тыгай тынеш пурымаш?

Статьян авторжо Алевтина Таныгина

Семёновкысо Рождество Пресвятой Богородицы храмын священникше Димитрий Иванов редакцийыш пурышо йодыш-влаклан вашешта.
Мо тыгай тынеш пурымаш?
Грек йылме гыч кусараш гын, «вӱд дене мушмаш, вӱдыш чыкымаш» лиеш. Тынеш Пуртышо Иоанн языкыштым почын ойлышо еҥ-влакым Иордан эҥерыш тынеш пуртен, тунам Юмо языкыштым кудалтен. Иоанн Иисус Христосым Шкенжымат тынеш пуртен, да тидын годым Святой Шӱлыш Иисусын ӱмбакыже волен. Варарак Иисус Христос тунемшыж-влаклан еҥ-влакым тынеш пурташ кӱштен. Сандене Витлыгече пайрем деч вара Христослан ӱшанаш тӱҥалше чыла еҥым Тудын лӱмжӧ дене тынеш пуртеныт. Тынеш пуртымаш Христос деке ушнымым, Тудын дене пырля колымым да у илышын тӱҥалмыжым ончыкта.
Тынеш пурымаш эн кугу таинствылан шотлалтеш. Тынеш пурышо кугыеҥын ты таинстве годым ончыч ыштыме чыла языкше ӱштылалтеш. Святой Черкын традицийже почеш шочшо азам кандашымше кечынже тынеш пуртыман. Тыгодым тудлан кресава ден кресачам ойырат. Нунын тӱҥ сомылышт – ньогам православий шӱлышыштӧ кушташ. Тыгак ача-ава дене иктаж-мо лиеш гын, кресава ден кресача икшывылан нуным алмаштышаш улыт. Эргылан кресача, а ӱдырлан кресава веле кӱлыт, но шукыж годым когыньыштымат палемдат.
Йочалан кресава ден кресачам ойырымо годым теве мом шотыш налман:
- марий ден вате ик йочалан кресача ден кресава лийшаш огытыл;
- кресача 15 ияш, а кресава 13 ияш деч изи лийшаш огытыл, нуно эше шкештат православийын законжым мучаш марте огыт пале;
- торжа койыш-шоктышан, осал шӱм-чонан еҥ-влакым йоча дек лишке кондыман огыл, порылыклан туныктен огыт керт;
- тынеш пурыдымо, Юмылан ӱшаныдыме еҥым тыгак кресавалан але кресачалан ойырыман огыл.
Кызыт кресава ден кресача-влак кресэрге ден кресӱдырлан шочмо кечыжлан да суксо кечыжлан пӧлекым ыштыме дене гына серлагат, но тиде эн тӱҥ огыл. Эн тӱҥ – тудлан тазалыкым йодын, молитвам лудаш, рушарня да кугу Черке пайрем годым храмыш пырчешым (причастие) подылаш коштыкташ, святой книга-влакым пырля лудаш, молитва-влакым туныкташ.

Ӱдырамашлан кажне тылзын эрыкталтмыж жапыште черкыш коштын кертеш мо?
Татьяна.
Йошкар-Ола.

Черкыш кошташ лиеш, но юмоҥам, ыресым кучаш, шупшалаш огеш лий.
Кызыт духовный ача шотышто шуко кутырат. Черкыш коштшо кажне еҥын духовный ачаже лийшаш мо?
Марианна.
Медведево.
Духовный ача – тиде священник, кудыжлан языкетым касарет, ой-каҥашым йодат, да тудо тыланет шӱм-чон ойгетым лыпландараш, духовно кушкаш полша. Тыгай ача кажне христианинын лийшаш. Мемнан республикыштат шӱм-чон тургыжланымаш ден илышысе нелылыкым кораҥдаш духовный ачам ойыраш лиеш.

Шочынавалан, святой-влаклан акафистым кунам лудаш сайрак: эрдене, кечывалым, кастене але йӱдым?
Владимир.
Кокшайск.
Куанен моктен мурымашым (акафист) кеч-кунам да кеч-могай жапыште лудаш лиеш.

Икшывым школыш але йочасадыш ужатыме годым могай молитвам лудман?
Елена.
Йошкар-Ола.
Православный христианин эр-кас молитвам лудшаш. Эр молитва почеш илыше-влаклан молитва уло, тушто тынеш пурышо чыла лишыл ден родо-тукымын лӱмыштым каласен, молитвам лудман. Вара колышо-влаклан молитва кая. Тудымат тыгак лудман. Туддеч вара веле ава йоча верч молитвам лудшаш.
Икшывым школыш але йочасадыш ужатыме годым ыреслыман.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: