"Сылнылык тӱня" рубрик, 2014 ий, Пургыж тылзын 7-ше кечыже

Тӱвыра идалык дене!

Статьян авторжо Анастасия Эманова

Российыште увертарыме Тӱвыра идалыкым 31 январьыште Йошкар-Олаште торжественно почыныт. Пайрем концерт М.Шкетан лӱмеш национальный драме театрыште эртен.

Идалык ийМероприятийыш Марий Эл правительстве вуйлатыше, тудын   алмаштышыже-влак, законодательный да исполнительный кучем орган, район-влакын вуйлатышышт, тӱрлӧ мер организацийласе чолга еҥ, тӱвыра аланыште тыршыше да журналист-шамыч погыненыт. Официальный церемоний деч ончыч нуно театрын фойештыже выставкым онченыт. Тудо Марий Элын тӱвыраже, тоштер, библиотеке-влакын пашашт, искусство аланыште шумо сеҥымашыж дене палдара.

Марий Эл Республикын вуйлатышыже Леонид Маркелов Тӱвыра идалыкым почын да шке возымо почеламутшым лудын. Л.Маркелов палемден: республикын илышыштыже культур кугу верым айла. Кажне ийын Марий кундемын рӱдолаже архитектур зданий, скульптур, памятник дене пойдаралтыт. Кызыт Э.Сапаев лӱмеш опер да балет театрын да Курчак театрын у зданийышт чоҥалтыт. Тений артист-влак тушко куснышаш улыт. А районлаште тӱвыра пӧрт-влакым да культур ден каныме рӱдерлам чоҥат да тоштыжым уэмдат.

Концертым уста коллектив-влак ончыктеныт. Тудын режиссержо Российын сулло артистше, Марий Элын калык артистше Константин Иванов лийын. Икымше номер  — «Марий Эл» вокал да хореографий композиций кумылым нӧлтышӧ да оҥай. Тушто шке мастарлыкыштым «Марий Эл» кугыжаныш  ансамбль, «Цармис» куштышо театр, «Рвезылык» куштышо ансамбль, «Марий кундем» калык семӱзгар кугыжаныш ансамбль, Курыкмарий район гыч кӱслезе коллектив ончыктеныт.

Марий Элысе тӱвыран историйже нерген видеофильм сай шарнымашым коден. Тудым республикысе фильмофонд ямдылен.

Йошкар-Оласе Национальный президент сымыктыш школын тунемшыже-влак хор дене кок  мурым муреныт да скрипке дене шоктеныт. Кажне театр тӱрлӧ спектакль гыч ужашым модын ончыктен, опер гыч ужаш йоҥгалтын. Тиде концерт программе кажне еҥын чоныштыжо куан тулым ылыжтен. А идалык мучко мемнам  ятыр оҥай да сылне тӱвыра мероприятий вучат.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: