"Улам мый Рве-зы-лык!" рубрик, 2014 ий, Пургыж тылзын 21-ше кечыже

Чолгалыкшым эре шуара

Статьян авторжо Анастасия Эманова

Екатерина Сидорова — Поволжский кугыжаныш университетын студенткыже, но шке илышыжым изинек журналистике дене кылдаш шонен. Чолга ӱдыр дене самырык этножурналистын школыштыжо палыме лийынам.

ПГТУ-н студенткыже Екатерина СидороваКатя 1990 ийыште Саратов областьыште шочын. Ешыште кумшо йоча (чылаже индеш икшыве) лийын. 6 ияшыж годым еш ачажын шочмо кундемышкыже, Звенигово район Эсмекпляк ялыш, илаш кусна. Ӱдыр верысе кыдалаш школышто тунемаш тӱҥалеш. «Школ жап эн оҥай да весела лийын. Кызытат тудо пагытым порын шарналтем. 8-ше класс марте тунеммылан жапым утларак ойыренам, тыгак школысо тӱрлӧ мероприятийыште участвоватленам. Варажым шочмо литератур дене олимпиадыште шинчымашем тергаш тӱҥалынам. Марий йылмым да литературым туныктышо Людмила Петровна Бородина мыланем да пырля тунемше ӱдыр Лена Кирилловалан олимпиадыште вийым тергаш темлен. Мыйым литератур дене ямдылен, а Ленам — шочмо йылме дене. 11 класс марте районысо да республикысе олимпиадылаште участвоватленна, – ойла ӱдыр.

– Тылеч вара литературым утларак йӧратен шынденам. 2005 ийыште юнкор слетышто участвоватленам. Тушто ме, тӱрлӧ район гыч толшо тунемше-влак, журналистын сомылжым шукташ тунемынна: статьям, почеламут-влакым возкаленна. Слет деч вара кумылем эше нӧлталтын. Изирак заметкым, фельетоным, почеламутым возкаленам да «Ямде лий» газетыш колтеденам. Мурсескемым газетыште ужмеке, шкемым шулдыраҥшыла чучынам да ончыкылыкемат журналистикыште веле ужынам. Садлан школым сайын тунем пытарымеке (аттестатыште алгебре дене веле нылытан лийын), документым Марий кугыжаныш университетыш филологий да журналистике факультетыш (кызыт историй да филологий) пуэнам. Бюджетный верыш тунемаш пурымо спискыште лийынам, но Поволжский кугыжаныш университетыште «Социальная работа» направлений дене тунемаш пуренам. А журналистикым шуэн омыл. Оласе ик организацийышке интервьюерлан пашаш пуренам да социологий йодыштмашым эртаренам. Чаманен каласыман, ты пашам кодаш логалын. Кызыт эше «Туризм» специальностьлан тунемам. Экскурсоведений курс келша. Йошкар-Оласе ик тоштерыште экскурсийым эртаренам, пырля тунемше ӱдыр-рвезе-влак дене  экскурсийым Йошкар-Ола мучко ыштенам. Чолгалыкем шуараш эре тыршем. Тӱрлӧ конференцийыш ушнем. Оксалан кӧра заказ почеш рефератым возем. Конешне, тиде сай огыл, но мыланем тыгай паша келша. Южгунам, тӱрлӧ материалым шымлымеке, преподаватель лияш шонымаш лектеш».

Катя йолташыж-влак дене канаш йӧрата. Телым коньки дене мунчалташ келша, а кеҥежым – ролик дене. Вер-шӧрым ончен кошташ йӧрата. Пытартыш гана Нижегородский областьысе Городец олаште лийын. Газетым эреак шергалеш, тӱрлӧ сайтыште уверым лудеш. Интернетыште самырык этножурналист школ почылтмо нерген увертарымашым ужын. «Моткоч йывыртенам, журналист лияш пӱрымашем манын шоналтенам да ӱжмашым колтенам. Изи годсо мечтам шукталтын: журналистлан тунемынам. Тау ты проектын организаторжо Эльвира Викторовна Куклиналан! Умбакыжат журналистике аланыште налме шинчымашем вияҥдаш шонем. Ончыкшым мыйым мо вуча, ом пале, но икте раш: туризм, социальный паша але журналистике дене кылдалтеш. Ойырымо пашам йӧратен ышташ тӱҥалам», - манеш Екатерина.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: