"Ӱшанем... Вучем..." рубрик, 2014 ий, Пургыж тылзын 14-ше кечыже

Чыташ але каяш?

Статьян авторжо Татьяна Айтова

Салам лийже, «Ӱшанем… Вучем…» лаштыкым лудшо-влак. Кызыт воктенем ӱшанле да умылен моштышо йолташ уке, садлан чонем тыланда почам.

Пелашем дене шым ий ончыч мужыраҥынна, кок ӱдырына кушкеш. Валера (лӱмым вашталтыме) пеҥгыде кап-кылан, пашаче пӧръеҥ. Кид-йолжо кеч-могай пашаланат толеш, мӧҥгыштӧ нигунамат яра огеш шинче. Ондак шочмо селаштына шофёрлан ыштыш, но жап вашталтмылан кӧра мӱндыр велыш пашаш кошташ логале. Тыге пелашем шочмо сурт гыч ик тылзылан каяш тӱҥале.

Кок икшыве дене шкетланем неле лийын гынат, чыташ пернен. Кондымо оксам эркын-эркын погенна, чапле сурт-оралтым чоҥенна. Ындыжым ласканрак илаш тӱҥалына манын шоненам, пелашемат тетла мӱндыркӧ колтымем шуын огыл. Но Валера пашаш коштмым чарнен огыл. Тидын верч чонем кажне гана корштен: ала-кушто мемнан верч толашен коштеш, ала темше ала уке манын, чӱчкыдын тургыжланенам. Пелашем дене кажне кечын манме гаяк телефон дене кутыренна,  кажне вашлиймашым йочала вученна.

Пытартыш жап марте шкем моткоч пиалан ӱдырамашлан шотленам. Тыгай пелаш дене чынжымак кугешнаш лиеш манын, шоненам. Конешне, коклаштына южгунам умылыдымаш лектын, но икте-весылан кужу жап нигунамат сырен огынал. Кажне толмыж еда эре пӧлекым конден, икшыве-влаклан оксам нигунамат чаманен огыл. Шуко палымем мыланем кӧранен, южыжо кызытат кӧрана дыр. Но ик кечын пиалан илышем лугыч лие. Такшым тудо ончычак пужлен улмаш, лач мый гына тидым ала-молан шижын омыл.

Ты кастене пелашем пошкудо дек кутыркален шинчаш кайыш. Пӧрт сомылкам ыштен шогымо годым телефонжо йыҥгыртыш. Трубкам налмек, палыдыме ӱдырамаш йӱкым колынам. Тудо ӱмбакем ажгыныше гай кычкырлен. Ондак нимом умылен омыл, ала-кӧ йоҥылыш йыҥгырта манын шоненам. Изиш лиймек ӱдырамаш шорташ тӱҥалын, Валерам тудлан пуаш йодын. Чылт ӧрынам, иканаште мом пелешташат пален омыл.

Кутырымо гыч пале лийын: пелашемын эше ик ешыже уло. Вуем ушдымо гай пӧрдын, ӱшанымыла чучын огыл. Тиде йоҥылыш але шоя манын шкем ӱшандараш тыршенам. Тунам Настя мылам интернетыште фотом ончалаш темлен. Жапым шуйкалыде, кӱлеш сайтыш пуренам да фотошто йӧратыме пелашемын вес ешыжым ужынам. Иктыштыжее тудын пелен иктаж кок ияш наре йыгыр-влак шинченыт. Рвезе-влак чылт марием гай чуриян лийыныт. Куш пураш, мом ышташ пален омыл, компьютер экраныш окмак гай шагат наре ончен шинченам.

Валеран толмекыже чыла рашемдаш пижынам. Тудо вожылде чыла калсен. «Ме тендам чыландамат ик семын йӧратем, нигудыжымат ом кудалте», — манын ойлен. Тыгайым колмек, ик жаплан вуйушым йомдаренам. Помыжалтмек, шуко жап шортынам, вара ойырлаш темленам. Валера тидын дене келшен огыл, мыйым лыпландараш тӧчен.

Теве шукерте огыл тудо адак мӱндыр велыш вес ешыж дек лектын кайыш. Чытен, вучен илаш але ойырлаш чылт ӧрынам. Тидын нерген тымарте нигӧланат ойлен омыл ыле. Пелашем молгунамсе семынак кажне кечын йыҥгырта, йӧратем манын ойла. А мый аҥыра гай лийынам, кузе лияш ом пале.

Тамара.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: