"Шинчымаш кугорнышто" рубрик, 2014 ий, Пургыж тылзын 14-ше кечыже

Шочмо школышто пашам ышташ пиал

Статьян авторжо Анастасия Эманова

Татьяна Лапина Кугу Пумарий кыдалаш школышто кудымшо ий педагог-организаторлан пашам ышта. Марий кугыжаныш университетым тунем пытарымеке, вигак шочмо кундемышкыже (Параньга районысо Кугу Пумарий селаште шочын-кушкын) толын. Самырык специалистым кумылын пашаш налыныт, адакшым тудо ты школыштак тунемын.

Татьяна Лапина - Кугу Пумарий кыдалаш школысо педагог-организаторТатьяна Евгеньевна йоча организацийым вуйлата. «5 классыште тунемше-влакым «Эрвий» организацийыш пуртена. Изирак тунемше-влак дене пашам ыштена. Тунемме ий мучко шуко мероприятийым эртарена. Биологийым туныктышо дене пырля пӱртӱс дене кылдалтше пашам ыштена. Районысо тӱрлӧ конкурсыш, мутлан, «Семейный архив», Краеведений», ушнена. Тыгак республик кӱкшытан конкурслаштат участвоватлаш тыршена», — ойла туныктышо.

Т.Лапина историй да филологий факультетысе марий да руш пӧлкам тунем пытарен. Марий да руш йылме-влакым туныктышо дипломым налын гынат, шке профессийже дене пашам ыштен огыл, организаторын сомылжым шуктен. А кызыт руш йылмым да ИКН-ым туныкта. 4-ше классыште тунемше-влаклан Основы религиозных культур и светской этики предметым вӱда. «Паша келша. Коллектив поро, полыш кидым шуяш эре ямде. Тунемше-влакат чолга улыт, кыртмен тунемыт, - манеш тудо. – Шкежат квалификацием нӧлташ тыршем. Районысо семинарлаш эреак ушнем. Тыгак районысо молодежный парламентыште кок созыв почела секретарьлан ыштем».

Самырык туныктышо почеламутым возкалаш йӧрата. Тудын мураршашыже «Кугарня», «Марий Эл» газетлаште, «Ончыко» журналыште савыкталтын. «Школышто тунемме годымак поэзий деке шӱмаҥынам. Варажым университетыште «Поэзий шепкаште» кружокыш коштынам. Ты кружокын савыктыме сборниклаштыже почеламутем-влак улыт. Кызыт Кугу Пумарий школышто «Юнкор» кружокым вӱдем. Тунемшем-влак кокла гыч кеч иктыже журналист корным ойыра гын, моткоч куанем ыле», — ойла Т.Лапина.

Татьяна Евгеньевналан поро йолташыже-влак посна почеламут сборникым лукташ темленыт. Пытартыш жапыште туныктышын жапше укелан кӧра почеламутым шагал воза.  Школ деч вара мӧҥгыжӧ изи эргыж дек вашка. Ньогам ачаж ден аваже ончаш полшат. Эрге мартыште шым ийым тема гынат, мастарын кушта да мура. Тидыже тудын вӱрыштыжак, очыни. Кочаже гармонь дене шокта, а коваж ден аваже мураш йӧратат. Аваже эсогыл клуб пеленсе «Йывырте» ансамбльыш коштеш, спектакльыште модеш.

Чолга туныктышо, кидпашам ыштен, чонжо дене кана. Пидаш йӧрата. Пӱртӱс лоҥгаш кумылын лектеш. Пашаштыже кугурак сеҥымашыш шуаш манын, ӱнаржым ок чамане. Шукерте огыл икымше категориян специалист лийын.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: