"Финн-угор тӱня" рубрик, 2014 ий, Ӱярня тылзын 21-ше кечыже

Вес ийын — Одо кундемыш

Статьян авторжо Анастасия Эманова

18 мартыште Йошкар-Оласе Сеҥымашын XXX идалыкше лӱмеш тӱвыра полатыште «Финн-Угрийын студентке миссше» III тӱнямбал конкурс эртен. Тушто Российысе тӱрлӧ регион гыч 8 чевер ӱдыр мастарлыкшым ончыктен. Кажныже шке калыкшым, элжым чапландараш тыршен.

Финн-Угрийын студентке миссше А.АнтоноваТы конкурс шкешотан пайрем лийын. Тудо эн ончыч калык-влак кокласе кылым пеҥгыдемдаш полшаш манын эртаралтын. Финн-угор тӱшкашке пурышо калык-влак ик еш гай лийшаш улына. Лачак тидым конкурс пеҥгыдемден. «Ты пайремым эртараш 500 тӱжем теҥге окса каен. МарГУ тидлан ик ырымат ойырен огыл. Тау генеральный партнерлан — Россий Сбербанкын Марий Элысе отделенийжылан, стратегический партнер-влаклан: Акашево агрохолдинглан да Мегафон компанийлан, информационный партнер-влаклан — «Марий Эл» ГТРК ден МариМедиа компанийлан», - ойлен МарГУ  ректорын сомылжым шуктышо М.Н.Швецов.

Мероприятий программе оҥай да келге лийын. Ӱдыр-влакым да ончаш толшо-шамычымат тыгаяк II фестивальыште сеҥыше Виктория Воронцова шке куштымашыж дене кумылаҥден, «Цармис» куштышо театр, «Рвезылык» куштышо ансамбль, «Марий мурсем» ден «Мурсескем» мурышо да куштышо ансамбль-влак, «Улыбка» йоча ансамбль да мурызо-шамыч куандареныт.

Конкурс шым этап гыч шоген. Икымше этап дефиле лийын. Ӱдыр-влак кызытсе илышлан келшыше национальный костюмым чиен лектыныт. Весе – видеовизитке. Тушто кажне конкурсантке видео гоч шке шочмо элже, олаж да вузшо нерген каласкален. Кумшо этап – сценический представлений. Ӱдыр-влак шке калыкшын пайремже да йӱлаж дене палдареныт. Пеш оҥай лийын одо ӱдыр Алина Антонован номерже. Тудо удмурт сӱанын кокымшо кечыжым кузе пайремлымым ончыктен. Югра кугыжаныш университетын студенткыже Лариса Миляхова хант калыкын Коракын кече пайремже дене палдарен, а Сыктывкар гыч Татьяна Напалкова — коми калыкын Шондыбан пайремже дене, карел ӱдыр Виктория Линдунен – «Как ходили в рожь на Петров день» вепс йӱла дене, мордва ӱдыр Татьяна Лисёнкова  шошо кечым кузе палыме нерген каласкален, Марина Тимушева коми калыкын тынеш пуртымо йӱлажым ончыктен. А Марий кугыжаныш университетын студенткыже-влак марий калыкын пайремже да йӱлаж дене палдарыше тугай чапле сценкым ончыктеныт, эсогыл зал совым ятыр жап рӱж кырен. Инга Милютина Пеледыш пайремын историйже нерген каласкален, сылне марий мурым мурен, а Алена Вершинина Ӱдырсий пайрем йӱлам ончыктен.

Умбакыже конкурсантке-влак шке ончыкылык профессийын кӱлешлыкше дене палдареныт. Карелий гыч толшо В.Линдуненын руш йылмым да литературым туныктышо профессий нерген шинча йӱлен каласкален.

Конкурсын 5-ше этапше – творческий номер. Тушто кажне ӱдыр шке талантшым тичмашын почаш тыршен. Шукынжо мурым муреныт, а марий ӱдыр А.Вершинина «Онарын кердыже» легенде гыч ужашым устан модын ончыктен. Тудлан МарГУ-со Национальный культур да межкультурный коммуникаций институтын кок студентше А.Кошаев ден Н.Иванов полшеныт.

Вара жюри ӱдыр-влаклан тӱрлӧ оҥай йодышым пуэден. Конкурсанте-шамыч пӱсӧ уш-аклым ончыктеныт.

Пытартышлан шошо бал лийын. Ӱдыр-рвезе-влак йӱксӧ гай сценыште «ийыныт». Ончен куанет.

Кажне участнице сайын выступатлен, шке калыкшын лӱмнержым волтен огыл. Жюри член-влаклан эн сайжым ойыраш неле лийын, очыни. Нуно ятыр жап каҥашеныт. Чыла ӱдырым посна номинацийыште палемденыт да шерге пӧлекым кучыктеныт. Вице-мисс, тыгак «Мисс вокал» Петрозаводскысо кугыжаныш университетын студенткыже В.Линдунен лийын. А Финн-Угрийын студентке миссше» лӱмым Удмурт кугыжаныш университетын студенткыже А.Антонова сеҥен налын. Вес тыгай конкурс Одо кундемыште эрта.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: