"Ӱшанем... Вучем..." рубрик, 2014 ий, Ӱярня тылзын 7-ше кечыже

Извате

Статьян авторжо Татьяна Айтова

Кава шем пыл дене петырналтын. Тораште огыл волгенче волгалтеш, мардеж пуракым пӱтыра, пушеҥге вуйым тодылшашла рӱза. Кенета кугу йӱр тӱҥале. Ялысе калык кӱтӱ гыч толшо вольыкым вӱташ поктен пурташ толаша. Шке семынышт кычкырлат, куржталыт, очыни, йӱреш нӧраш лӱдыт. Ты сӱретым Савелий шаҥгысек эскерен шога. Тудо клуб воктене ынде шагат наре йӧратыме таҥжым вуча. Светаже гына ала-молан толаш ок вашке, ала иктаж сомылжо уло, ала тудат йӱр деч лӱдын.

Тыге икмыняр жап шогыш, йӱр эркын-эркын эртен кайыш. Теве тораште огыл ала-могай ӱмылка койылалтыш. Тиде йӧратыме Светаже толеш, уке толеш огыл, йӱксыла иеш. Рвезын чонжо лектын вочшашла кӱлтка…

Тиде омо Савелийлан чӱчкыдын кончен, икмыняр ий ончыч лийше чевер мӧр гай тамле самырык пагытым уэш-пачаш шарныктен. Йӧратыме Светажат шукертак пелашыже лийын. Нуно икте-весыштым ик жап мужыр йӱксӧ гай йӧратен коштыныт, а Пеледыш пайрем кечын кугу сӱаным ыштеныт. Посёлкысо ик организацийыште пашам ышташ тӱҥалыныт. Ик тат гыч нунылан пачерым пуэныт. Еш илыш ласкан эртен. А ик сылне кеҥеж кечын ешыште изи падыраш шочын. Тудо ачаж ден аважлан каласен мошташ лийдыме куаным пӧлеклен.

Тыге кече почеш кече эртен, пиалан мужырын ӱдыр йочашт шочын. Еш кинде сукыр гай тичмаш лийын. Ваш-ваш пагален, йӧратен иленыт, но ик кечын илышыштым пуйто шем шыҥалык вӱдылын. Света нелын черланен да илыш дене чеверласен. Кугу ойго ешым пырняла пызыралын. Савелий арака дене таҥлалтын, икшыве-влаклан кочде шинчаш ик гана веле огыл пернен. Арака ошо гынат, нерым йошкартен, илышым пужен. Йоча-влак чот йӧсланеныт, вет ача авам нигунамат алмаштен огеш керт.

Изиш лиймек, Савелий пошкудо ялысе Маруся ӱдырамаш дене ушнен. Тудат марийже деч посна кок икшыве дене кодын улмаш. Тыге кок сусыр чон пырля лийын. Ондак ик жап чыла сай лиеш. Йоча-влакат пырля модыт, садикыш коштыт. Но кугурак лийме семын изватын икшывыже-влак Савелийын йочаже-шамычым ойыркалаш, мыскылаш тӱҥалыт. Тыге ешыште умылыдымаш лектеш, туманлымаш тарвана. Извате еҥ икшывым эре вурсен, коклан кид денат совен пуэн. Савелий гына шыпак коштын, шке икшывыжым арален налын огыл.

А икана Маруся пачерым ужалыме нерген мутым луктын. Пуйто нуно кок пачерым ужалат да иктым сайым, кугуракым налыт. Савелий ты ой дене келшен. Кутырымо семынак ыштат, Маруся оксам шкаланже налеш, у пачерым шке ӱмбакыже возыкта. Вара Савелий ден икшывыже-влакым ялысе тошто пӧртыш поктен колта. Пӧръеҥ арака деке утларак шӱмаҥеш, йоча-влак утыр орланат.

Илышын тыге савырнымыжлан кӧ титакан? Пӧръеҥ шке икшывыжым ӱдырамаш деч посна йол ӱмбак шогалтен огеш керт мо? Ала вара кӧргӧ вийже, пеҥгыдылыкше йӧршеш уке?

В.Галеев.

Пошкырт кундем, Дӧртыльӧ район, Искуш ял.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: