"Кузе илет, эрвел марий?" рубрик, 2014 ий, Ӱярня тылзын 14-ше кечыже

Кажне тунемшыжым чот йӧрата

Статьян авторжо Ирина Степанова

Кодшо арнян командировко дене шочмо Пошкырт кундем Мишкан районыш миен толна. Тусо илыш да еҥ-влак дене тендамат палдарена.

1-2Тӱняште шуко профессий уло. Тушеч ик эн кӱлешанже – тиде туныктышо, вет лач тудо йоча-шамычым лудаш-возаш, тачысе илышым умылаш, ончылно лекше кеч-могай ситуацийыштат чын корным муаш туныкта.

Лач тыгаяк Мишкан районысо Чорай кыдалаш школышто марий йылме ден литературым туныктышо Анжелика Юзукбаева.

«Кажне еҥ шке шочмо йылмыжым палышаш да йӧратышаш. А мемнан марий йылмына моткоч лыжга да шыма. Поян марий фольклорна, марий йӱлана. Тудым йоча-шамычлан шыҥдарен да туныктен шогыман», — ойла кӱшыл категориян туныктышо. Адакшым ынде икмынярымше ий  Чорайысе школ марий гимназийлан шотлалтеш. Тыгайже тӱняштат икте гына. Уло Марий Элыште Советский район Ӱшнӱр селаште марий лицей да Чорайыште марий гимназий. Садлан тысе йоча-шамыч чыла шотыштат марий кумылан лийшаш улыт: марла моторын кутырышаш, марий тӱням палышаш, марий газет ден журнал-влакым лудшаш. Вет моло-шамыч нунын деч примерым налыт. Анжелика Леонидовна пошкудо Кульчубай ялеш шочын-кушкын. 1996 ийыште Чорай школым тунем пытарымеке, Пӱрӧ кугыжаныш пединститутын филологий факультетышкыже тунемаш пурен. 2001 ийыште дипломан специалист шочмо школышкыжо толын да социальный педагоглан тыршаш тӱҥалын. Вара ик жап директорын воспитательный паша шотышто алмаштышыжлан ыштен. А ик жап гыч тудым шочмо йылмым туныкташ кусареныт.

Таче Анжелика Леонидовна занятий деч посна сылнымут кружокым вӱда. Тудын тунемшыже-шамыч «Чолман» ден «Ямде лий» газетлашке возкалат.  Теве шымше класс гыч М.Шамаева ден кандашымше класс гыч М.Изилянова да А.Чиноева ӱмаште Марий Элыш юнкор слетыш толын коштыныт. Тыгак тунемшыже-влак кажне ийын гаяк марий йылме да литератур дене районысо, республикысе олимпиадылаште сеҥат. Йошкар-Олаште эртыше регион кӱкшытан олимпиадыштат кугу лектышым ончыктат. Тений 11 класс гыч Д.Изилянова, 10 класс гыч  И.Николкина да 9 класс гыч К.Каптеева призовой верлашке логалыныт. Ынде икмынярымше ий почела А.Юзукбаева йоча-шамыч дене кеҥежым каникул жапыште «Изеҥер» профильный лагерьыште пашам ышта. Тыгодым икшыве-шамыч марий фолькорым, йӱлам келгынрак тунемыт, мурат-куштат, марий пӧртым сӧрастарат, тошто марий костюм-шамычым поген, выставке-влакым ямдылат. Школын ойырымо автобус дене тӱрлӧ вере экскурсийыш лектыт. Тений гимназийыште «Ялкайным лудмаш» кугу мероприятий эртен.

Анжелика Леонидовнам мӧҥгыштыжат пелашыже да кум йочаже йӧратат да вучат. А ава ден ача лийшыже шке шешкыштым шочмо ӱдырышт семынак йӧратат.

Анжелика Леондиовнан ончылно эше шуко планже уло. Ӱшанена: тудын чылажат сай лиеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: