"Кузе илет, эрвел марий?" рубрик, 2014 ий, Ӱярня тылзын 14-ше кечыже

Кирилл деч чемпион лиймым вучена

Статьян авторжо Ирина Степанова

Таче Сочиште XI  Паралимпийский телымсе модмаш тӱҥалеш. Тушто Россий сборныйын чапшым марий рвезе, Пошкырт кундем Мишкан районысо Монар ялын эргыже Кирилл Михайловат арала. Тудо таче ече дене куржмашке ушна. А тыгеже шым таҥасымаште вийжым тергаш тӱҥалеш.

Кодшо кечылаште Монарыште Кириллын ача-аваж деке унала пурен лекна. Ачаже мӧҥгыштыжӧ шкетак ыле, пелашыже Бирскыш шешкыж (Кириллын пелашыже) деке йоча-шамычым ончаш полшаш каен.

- Кирилл 1983 ий апрельыште шочын. Изинекак ече ден кошташ йӧратен. Йолышкыжо ондак портышкемым, портышкем ӱмбак катам чия, вара-  ечым. Тыге курыкыш вашка ыле, — ойла ачаже.

Кириллын ешыже спорт деке шӱман лийын. Вет Монар воктенсе курыкышто ече дене район кӱкшытан таҥасымаш чӱчкыдын эрта. Кириллын ача-аважт спорт дене кылым кученыт. Валентин ден Володя изаже-влак, Валентина акаже Башкортостанын ече дене чемпионжо лийыныт. Кирриллат спортым йӧратен. Ондак районын, вара республикын чапшым арален. Но 10-шо классыште тунеммыж годым мотоцикл дене аварийыш логалын да йолжым сусыртен.

«Тиддеч вара ечышке огеш шогал дыр шонышым, но шогале», — ойла ачаже.

2006 ийыште Италийысе Турин олаште Паралимпийский модмаш эртен. Тиддеч икмыняр тылзе ончыч йолташыже Ростислав Павлов Кириллым паралимпийский модмашыш ушнаш ӱжын. Кирилл келшен, но тушко кудалаш шуко окса кӱлын. Адакшым сай ече уке лийын. Кириллан Монар школ директор Р.М.Ибаев кумылын полшаш пижын. Кирилл дене пырля шке кундемысе бизнесмен-влак деч 38 000 теҥге наре оксам погеныт, ечым налаш вуйлатыше-влак деке оксам йодын возеныт (кызыт Кириллын 18 мужыр ечыже уло). Тыге К.Михайлов Кирилл Туриныш логалын да ече дене 20 меҥгым куржмаште Паралимпийский чемпион лийын, тыгак 10 меҥгым куржмаште той медальым налын. Тиддеч вара 2010 ийыште Ванкуверыште эше ик гана тале да писе улмыжым пеҥгыдемден.

Спортсменын илышыже куштылго огыл. Эн ончычак, эре сборышто, соревнований-влаклан ямдылалтмаште лийман. А нунышт тӱрлӧ вере: Эстонийыште, Болгарийыште, Финляндийыште – эртат. Самырык пӧръеҥым ешыже пеш шуэн ужеш. Кызыт Лада пелашыже ден индеш ияш Даниил да куд ияш Корнил эргыже Пӱрӧ олаште шке пӧртыштӧ илат. Кугуракше школыш коштеш, изиракше – йочасадыш. Ачаштым нуно кажне кечын вучат. «Мый вес гана шке ватемым тынар жаплан шкетшым ом кодо. Тыге илаш йӧсӧ», — тыге каласен ик гана Даниил кочажлан.

Кириллын ачаже ӱмыржӧ мучко колхозышто водитель лийын. Аваже, Мария Яметовна, ондак кевытче лийын, вара школышто йоча-шамычым тамлын пукшен, ик жап верысе кондитер цехыште ыштен.

Таче уло Монар, Мишкан калык да меат Кирилл верч тургыжланена. Туддеч сеҥымаш-влакым вучена.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: