"Кузе илет, эрвел марий?" рубрик, 2014 ий, Ӱярня тылзын 14-ше кечыже

«Мишкан сем» кумылым вӱчка

Статьян авторжо Ирина Степанова

Калык лӱмым нумалше ты ансамбль шуко еҥым куандара. Тудын нерген коллективын чолга мурызыжо З.Б.Айгишева каласкала:

- Мемнан марий калык мурылан пеш поян, кидпашам ышташ мастар. Муро айдемын илыш нерген шонкалымашыжым, куан ден ойгыжым, йӧратымашыжым почын пуа. мишканМуро дене илаш куштылго. Садлан пенсийыш лекмеке, 2007 ийыште икмыняр ӱдырамаш Мишкан РДК пеленсе хорыш кошташ тӱҥална. А вара ансамбльым погаш шонымаш лекте. Тыге «Мишкан сем» мурышо ансамбль шочо. Тушко шке жапыштыже медицине, тӱвыра, печать, связь аланыште тыршыше лу ӱдырамаш коштына.

Репертуарна тӱрлӧ сынан мурылан поян, тушто тошто годсо калык муро да тачысе эстраде муро-шамыч улыт.

Ме районыштына эртыше ятыр мероприятийыш ушнена. Сабантуйышто, тӱрлӧ фестивальыште, концертыште мурена. Моло вереат концерт дене лектын коштына.

Ансамбльнам тӱҥалтыште педагогике пашан ветеранже, баянист Владимир Васильевич Васильев вуйлатыш. Таче Мишканысе тӱвыра пӧртын баянистше Геннадий Александрович Иксанов вуйлата. Тудын туныктымыж почеш коллективна тӱрлӧ йӱк дене мураш тунемеш.

Тау тылат, «Мишкан сем», шочмо калыкын тӱвыражым арален кодымаште тыршыметлан.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: