"Рубрик деч посна", 2014 ий, Вӱдшор тылзын 16-шо кечыже

«АТЕКС» фирмыште профессионал-влак тыршат

Статьян авторжо Татьяна Иванова

«АТЕКС» фирмыште  профессионал-влак тыршат

Кажне кундемын шке чолга еҥже уло. Самырык да вийвал пӧръеҥ-влакын шочмо верыштак пашам ыштымыштым, тыгодымак калыклан полшымыштым ужын, чонышто поро кумыл волгалтеш. Ялым тӱзатымашке кугу надырым пышта Морко посёлкышто верланыше «АТЕКС» ООО. Тушто ик еш семын илыме шӱлыш озалана. Чыланат пашалан писе, кожмак улыт, шижалтеш, сомылыштым йӧратен шуктат. Вуйлатышын кабинетышкыже  пурымо годым мемнам чатката капан марий пӧръеҥ вашлие.  Паша ӱстелыштыже фотом ужна, ме поэт Валерий Апакаевым палышна. «АТЕКС» фирмын вуйлатышыже илыш дене чеверласыше  ачажым тыге шарналта да ончен куштымыжлан тудлан таушта.

«АТЕКС» фирмын лӱмжӧ Морко районышто веле огыл, республикысе икмыняр районыштат палыме.

Б.АпакаевФирме 2010 ий 10 октябрьыште почылтын, шуко шӧрынан тӱрлӧ сомылым шукта.  Тылеч ончыч «Триколор» спутник телеантенным веле вераҥден гын, кызыт пластик окнам  шындылеш, тыгак фундамент гыч тӱҥалын, мучаш марте пӧртым чоҥен пуэн кертеш, тыгодымак тӱрлӧ системым ушен пуа.

Вуйлатыше Борис Валерьянович Апакаев деч пашашт нерген радымын каласкалаш йодна.

«Илыш ончыко кайыме дене яллаштат, поселкыштат спутник антенным, пластик окнам шукын шындат. Тылеч посна кугу объектлаш, тыгак кевытлаш, кугыжаныш учрежденийлаш видеонаблюденийым,  охранно-пожарный сигнализацийым, кондиционерым вераҥдена.  Пачерыш вӱдпучым, отоплений системым, канализацийым шынден да ушен пуэна. Электромонтажым ыштена, электричествым шотлышо приборым  вераҥдыме сомылым виктарена», — палемдыш вуйлатыше.

Пластик окнам шындыме шотышто «АТЕКС» ООО  - Чебоксарысе «Мир окон и дверей» компанийын официальный диллерже. Российыште ты компаний пластик окнам да омсам ыштыше ик эн кугу предприятийлан шотлалтеш.

«ГОСТ-ын йодмыж дене келшышын, пашам шуктена. Пласик окна-влак сай качестван, эстетичный улыт. Пӧлемыште йӱштӧ юж ок кошт, телым йӱштӧ деч, кеҥежым чот шокшо деч арала. Окнан конструкцийже йӧнан, шонымо семын пӧлемышке яндар южым пурташ лиеш, вӱдыжгӧ ок погыно, урем гычат йӱк-йӱан огеш шокто. Тулым, волгыдым, газым аныклаш полша, адакшым  чиялташ огеш кӱл.  Тыгай окна моторын коеш, огеш шӱй.  Эше ялысе пу пӧртышкат пластик окнам шындена. Окна йымалсе пырням вашталтена, дизайн дене келшыше у окнам вераҥдена.

Йодмаш пурымек, верлашке лектын, окнан кугытшым висена, кӱлеш ой-каҥашым пуэна, келшыше эскизым ыштымек да кутырен келшымек, клиент дене ойпидышым ыштена да вич-шым кечыште ямдылен шуктена. Висыме пашам, консультацийым  да  ямде окна намиен шуктымо сомыл яра ышталтеш. Окнам шындымеке, кум ийлан гарантийым пуэна.

Мемнан фирмынан специалистше-влак пластик окнам шындыме шотышто Озаҥыш, Чебоксарыш семинарыш, тӱрлӧ курсыш чӱчкыдын тунемаш коштыт», — умбакыже ойлыш Борис Апакаев.

Мутланымашке вуйлатышын административно-хозяйственный паша шотышто алмаштышыже Дмитрий Афанасьев ушныш.  Тудо  предприятийлан мо кӱлешым шеклана, чыла ситыже манын тырша. «Ондак Озаҥыште промышленный альпинистлан пашам ыштенам, монтаж сомылым шуктенам. Тушеч тышке пашаш толынам. Сай пашадарым тӱлат. Фирме мылам изи  еш гай чучеш», — каласыш Дмитрий да сомыл дене кайыш. Тудо Унчо гыч, ешыж дене Моркышто ила, Йошкар-Оласе радиомеханический техникумышто тунемын.

Вара мемнан деке тӱҥ инженер Эдуард Тихонов ушныш. «Тӱрлӧ программылан эҥертенамодернизаций да моло программе илышыш шыҥдаралтеш. Теве школышто видеонаблюденийым  шынаш мемнан деке йодмаш дене толыт, вес районышкат, мутлан, Шернур, Марий Турекышке миен коштынна. Документ да проект пашам виктарена», — манеш Эдуард Иосифович.

Тышкыже ОКВЭД дене кылдалтше сомыл-влак:  электромонтаж, санитар-технический  пашам шуктымаш — пурат.

«АТЕКС» фирмыште 10 еҥ тырша. «Мутлан, иктаж еҥ пӧртым чоҥынеже, шке гыч кузе тӱҥалаш огеш пале, тыгай годым полшен кертыда мо?»- йодым Борис Валерьянович деч. Тудо  тыге вашештыш: «Проектно-изыскательные работы» услугына уло. Пӧртлан негызым пыштыме гыч тӱҥалын, спутник антенным сакымешке чыла ыштен кертына. Еҥ-влакым тарлаш, мучаш марте шукташ кужу жап кая. Ме чоҥышо организаций  денат, индивидуальный предприниматель-влак денат кылым ыштенна. Иктаж йодыш лектеш гынат, верыштак  улына, моло чоҥен кайыше, але инженер пашам шуктышо-влакым кычал коштмо гай огыл. Чыла шуктымо сомыллан вуйын шогена.».

Тиде фирме, чынак, шуко сай сомылым шукта. Оксам жапыштыже тӱлен кертдымылан рассрочкым пуа, кредитым оформитлаш полша. Пелен паспорт лийшаш.

Командировко дене мийыме кечынат. ялла гыч спутник антенным, пластик окнам шындаш йодмаш дене еҥ-влак толынак шогышт.

пашаштым сайын палыше специалист-влак тыршат.

Борис Валерьянович Апакаев 1978 ий 27 ноябрьыште Морко районысо Унчо ялыште шочын. 1996 ийыште Унчо школым пытарымек, МарГТУ-шко радиотехнический факультетышке тунемаш пурен, «Радиосвязь, радиовещание и телевидение» специальность дене инженер дипломым налын.  Паша корныжым Моркысо РУЭС-ын Шеҥше селасе связь узелыштыже тӱҥалын. Космический войскаште салтак корныжо эртен. Телекоммуникаций технологий сферыште шкенжын шинчымашыжым келгемден толын. 2010 ийыште «АТЕКС» фирмым почмашке ушнен. 2013 ий гыч «Моркинскагропромэнерго» кооперативын председательже.  Благотворительность, спорт ден тӱвыра мероприятийлашке кумылын ушна, эре полшен шога. Кеч-могай пашалан пижеш, мучаш марте шот дене ыштен шукта. Ешан, кум шочшыжо уло.

Т.Иванова.

И.Речкинын фотожо-влак.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: