"Ме марий улына" рубрик, 2014 ий, Вӱдшор тылзын 4-ше кечыже

Исполком кугу пашам шукта

Статьян авторжо Ирина Степанова

Мер Каҥашын вуйверже пелен исполком пашам ышта. Тидын шумлык 2012 ийыште пленумышто пунчалым лукмо. Туштак исполком вуйлатышым сайленыт. Ты сомылым В.И.Иванов кумылын шукта.

мужикМер Каҥашын вуйверже исполкомын членже-шамычым палемден. Тиде — Л.Ш.Баширов, А.А.Петров, В.П.Григорьев да Э.В.Куклина. Могай сомылым исполком шукта? Кушто тудо верланен? Тидын нерген исполком вуйлатыше В.И.Иванов каласкала.
- Исполком Мер-политике рӱдерыште верланен. Тӱрлӧ йодыш лектеш гын, 211-ше кабинетыш толман. Мемнан тӱҥ пашана: вуйверлан (президиумлан) да Мер Каҥашлан паша кышкарым (планым) ыштымаш. Планым палемдена ик ийлан, тыгак кажне кварталлан. Тылеч посна ончыкылыклан (перспективный) план — мемнан ӱмбалне. Тудым 2016 ий марте ямдыленна. Вара чыла тидым Оньыжа Анатолий Николаевич да Мер Каҥашын вуйверже дене пырля ончен лектына.
Планым ыштымаш – тиде икте, тудым вет шке жапыштыже шуктыман. Тидымат ме эскерена. Тылеч посна тӱрлӧ программым, мероприятий-влакым кузе эртарымым ончена, Марий калыкын IX погынжын резолюцийжым кузе шуктымым эскерена. Кажне кварталыште ыштышаш пашашке резолюцийыште ончыктымо икмыняр пунктым пурташ тыршена. Тудым вара вуйверлан темлена. Тыгак вуйверын кӱштымыж почеш ме республикысе образований да науко министерстве дене пырля график почеш районлаште марий йылмым туныктымо паша кузе кайымым эскерена. Але марте вич школыш миенна. Тыге марий йылме шотышто могай сӱретым раш ужын кертына да умбакыже тидын шотышто мом ышташ кӱлмым рашемдаш сай.
Тыгак марий форумым, пленумым, вуйверын заседанийже-влакым ямдылена. Оньыжа, вуйвер дене пырля паша кышкарым, докладчик-влакым палемдена.
Мер Каҥашын еҥже-влаклан тӱрлӧ семинарым эртараш тӱҥалме. Идалыклан кок гана чумырена. Кум тыгай семинар эртен. Ик ганаже марий кумалтыш-влакым эртарыме радам дене онаеҥ-влак палдареныт, вес ганаже верыште паша планым возымо, активым погымо шотышто ой-каҥашым пуымо. Тыгак самырык-влаклан семинарым эртарыме.
Вуйвер дене пырля верысе актив дене пашам ыштена. Делопроизводство (планирований, протокол, пурышо письма, списке) пашам сайын шуктена, садлан нимом кычал коштмо ок кӱл – чылажат кагазыште уло. Тидын шотыто район-шамычланат полшена.
Информационный пашамат шуктена. Тидлан Э.Куклина вуйын шога. Мер Каҥашын шкенжын сайтше уло. Тудым жапыштыже уэмден, ешарен шогена.
Исполком тӱрлӧ «йыргешке ӱстелым», семинарым, научно-практический конференцийым эртарымылан вуйын шога. Мутлан, марий йылмым арален кодымо шотышто пытартыш жапыште кум «йыргешке ӱстелым» эртарыме: Йошкар-Олаште, Шернур да Марий Турек районлаште. Тышке верысе Шанче министерствын специалистыштымат ушена. Министерстве-шамыч дене кыл пеш пеҥгыде. Нигӧ мыланна полшаш тореш огыл.
Чынжымак, исполкомын пашаже ятыр. Но вуйлатыше да тыште тыршыше-влак вуйым огыт шупш. Палат: нунылан ты пашам ӱшанен пуымо, а ӱшаным эре шуктыман.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: