"Сылнылык тӱня" рубрик, 2014 ий, Вӱдшор тылзын 4-ше кечыже

Куэм сӱретлаш йӧратыше художник

Статьян авторжо Анастасия Эманова

20 апрель марте Йошкар-Оласе Изосымыктыш тоштерыште самырык художник Г.А.Яндыгановын «Родина» персональный выставкыже эрта. Тушто тудын 51 эн сай пашажым чумырымо.  

Туныктышыжо-влак коклаште самырык художник Геннадий ЯндыгановГеннадий Анатольевич Медведево районысо Цибикнур селаште шочын-кушкын. Кызыт Санкт-Петербургышто ила. «Ешыште кум икшыве лийынна. Кум ияш улмем годым ачам илышыж дене чеверласен. Ава шкетын мемнам йолымбак шогалтен. Чыланат илышыште шке вернам муынна. Костя шольо Черноморский флотышто служитла, Саша шӱжарем Санкт-Пеербургысо морской технический университетыште тунемеш да пашам ышта», — ойла сӱретче.

Г.Яндыганов изинек сӱретлаш йӧратен. Йошкар-Оласе 1-ше №-ан йоча художественный школым тунем пытарымеке, художественный училищыш каен. Самырык рвезе пӱртӱсым сӱретлаш шӱман лийын. Талантшылан кӧра Геннадий 2004 ийыште «Одаренные дети России» конкурсын стипендиатше лийын, Олык Ипай лӱмеш премийын да «Молодые таланты Республики Марий Эл» премийын лауреатышт лийын.

Училище деч вара Г.Яндыганов Санкт-Петербургысо И.Е.Репин лӱмеш живопись, скульптур да архитектур кугыжаныш академический институтыш тунемаш пура. Куд ийыште шуко чапле сӱретым сӱретлен, тӱрлӧ выставкыште шке пашажым ончыктен, ятыр конкурсышто сеҥен, эсогыл Канн олаште эртаралтше Россий да Франций искусство  самырык тукым VI фестивальыште участвоватлен.

Институтыштак ончыкылык пелашыжым, художнице Лариса Логуным, вашлийын. Лариса пелашыжлан сай эҥертыш лияш тырша. Пашаштыже кӱлеш годым каҥаш дене полша. Тудын нерген ик осал шомакымат ок ойло. А кузе нуно ваш ончат, шинчашт тыгай келге йӧратымаш, пагалымаш дене йӱла.

Художник Г.А.Яндыгановын "Ветераны" сӱретшеГеннадий пейзажым, портретым сӱретлаш йӧрата. Шуко пашаштыже куэм ужаш лиеш. «Ладыра куэ эре сымыстарен. Тудо мыланем шочмо кундемын симвожо. Таклан огыл ты выставкем «Родина» маналтеш. Йӧратыме верем уло – Санкт-Петербургысо Исаакиевский собор. Тудланат ятыр картинем пӧлеклалтын, — ойла художник. — Пейзажым сӱретлаш тӱҥалме деч ончыч сылне оҥай вер-шӧрым кычалман. Тиде эн шуко жапым налеш. А сӱретлаш южгунам кок шагатат сита. Выставке шотышто каласынем: Марий Элыште тудо икымше гана эртаралтеш. Ончаш толшо-шамычлан тауштем. Изосымыктыш тоштерлан выставкым эртараш верым пуымыжлан «Весной» лӱман картинем пӧлеклем».

Художникын сӱретше-влак чынжымак оҥай улыт. Кажне пашаже чонышто куан тулым ылыжта, порылыклан ӱшандарыкта. Теве, мутлан, Кугу Отечественный сарыште лийше кован портретше шонаш тарата. Тудо шуко йӱштӧ-шокшым чытен, илышын кочыжым тамлен. Тидыже тудын келге куптыр да нойышо, но тыгодымак порылык да куан дене йӱлышӧ шинчаончалтышыж гыч коеш.

Сӱретче кызыт Санкт-Петербургысо частный школышто йоча-влакым сӱретлаш туныкта, тыгак школ деч вара умбакыже художественный тӧнежыш тунемаш пураш шонышо-шамычлан академический курсым вӱда. А Лариса ватыже йоча художественный школышто пашам ышта.

Г.Яндыгановын пашаже-влак моткоч сылне улыт, нуным ончыде огешак лий. Сылнылык дене йолташ лийнеда гын, ты выставкыш толза.

Национальный искусство шотышто шанче пашаеҥ Лариса Илтубаева:

- Пашаштыже художник-монументалист Игорь Петрович Мясниковын, чаманен каласыман, ӱмаште тудо колен, художник Валерий Александрович Чеботкинын, тыгак Санкт-Петербургысо академический институтышто пашам ыштыше художник-влакын влиянийышт шижалтеш. Туге гынат Геннадий шкешотан илыш умылымашыж дене ойыртемалтеш. Лачак тидым выставкым почмо кечын Российын калык художникше Зосим Федорович Лаврентьев палемден. Тудлан Геннадийын пашаже-влак моткоч келшеныт.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: