"Сылнылык тӱня" рубрик, 2014 ий, Вӱдшор тылзын 4-ше кечыже

Марий филармонийын чыла концертше чаплын эртен

Статьян авторжо Татьяна Иванова

26-31 мартыште лийше  «Шошымсо Йошкар-Ола» сымыктыш  фестивальым шукын онченыт. Тудым Я.Эшпай лӱмеш Марий кугыжаныш филармоний эртарен.

Калыкын кумылжым «Сказание земли марийской» кугу премьер иканаште авалтен. Моткоч чаплын эртыше хореографий спектакль нерген 11-ше номеран газетыштына кумдан возенна ыле. Шуко еҥын йодмыж почеш ты куштымаш спектакльым 24 апрельыште 18 шагатлан М.Шкетан лӱмеш Марий театрыште угыч ончыктат.

Вич кече эртыше фестивальын дневникшым шергалына.

Я.Эшпай лӱмеш Марий кугыжаныш филармонийым вуйлатышын сомылжым шуктышо Э.Юзыкайн фестиваль кузе эртыме нерген каласкалыш:

- «Мемнан тӱҥ сомылна – марий культурым кӱшкӧ нӧлташ, сай да качестван программым ямдылаш да калыклан ончыкташ. Кызыт шукын «Марий Эл» кугыжаныш ансамбльын Марий Эл вуйлатышын грантше негызеш шындыме «Сказание земли марийской» постановко (26 мартыше М.Шкетан лӱмеш театрыште эртен) нерген ойлат. Ме, ончен лекмек, экшыкым кораҥдаш, технический уто-ситым тӧрлаш шонена.

3-сопрано-на-сцене27 мартыште Марий театрын полатыштыже А.Искандаров лӱмеш кугыжаныш капеллын 80 ияш лӱмгечыжлан пӧлеклатше кугу концерт эртен. Икымше ужашыште академический ден классик муро-влак йоҥгеныт. Хорым йӧратыше-влаклан тиде кугу пӧлек лийын. Кокымшо ужаш у жанрым почын пуэн. Идалык наре капеллыште муро театр пашам ышта, ты гана ойыртемалтше усталыкшым ончаш пиал шыргыжалын. У койыш-шоктышым чылан ик семын вашлийын огытыл, кӧлан келшен, кӧлан пешыжак огыл, туге гынат ончаш толшын ойжым шотыш налын, умбакыжат театрализоватлыме постановкым ончыкташ тӱҥалына.

28 мартыште М.Шкетан лӱмеш театрыште «Таланты мира» фондын кум сопранын гала-концертше моткоч сайын эртен. Тӱнямбал опер театрын солисткыже-влак Елена Семенова, Лилия Пивень, Вероника Погребная-Ляликова  Италийыште, Германийыште, моло элысе кугу опер сценыште мурат. Нунылан Йошкар-Ола да ончаш толшо-влакын кумылышт чот келшен, мошта марий калык  ӧрдыж унам шокшын вашлийын. Мыйын шонымаште, кугу мастарлыкан мурызо-влакым колышташ утларак коштман, виян йоҥгалтше  мурым умылыман, палыман,  ош тӱняште могай  мастарлык улмым ужман.

29 мартыште Сеҥымашын ХХХ идалыкше лӱмеш тӱвыра полатыште «Чолга шӱдыр» телефестиваль эртен. Тудо ретро сынан лийын, «Шӱмеш кодшо муро» маналтын. 1970-80-90 ийласе муро-влакым шарналташ йӧным ыштенна. Экраныште тошто годсо мурым мурышо видео койын гын, сценыште тиде мурымак кызытсе артист-влакын йоҥгалтарымышт куандарен. Эксперимент сайын эртен, шонем. Залыште шинчавӱдым ӱштылшӧ-влакымат шекланышым. Умбакыжат ты корным вияҥдаш, утларак мурым муаш да тудлан илыш вийым пуаш тӱҥалына. Шыжым эше ик тыгаяк концертым эртарена, тушко руш мурызо-влакат ушнат.

31 мартыште М.Шкетан лӱмеш Марий театрыште «Марий кундем» калык семӱзгар оркестрын коцертше дене фестиваль петырнен. Тудо тыгак оркестрын 30 ияш лӱмгечыжлан пӧлеклалтын. Калык кум шагат чоло илыше музыкым колыштын, чон канен каен. Совым кужу жап рӱж кырен.

Филармоний тиддене пашажым огеш мучашле. Ончылно шуко у программе вуча. Республикысе кугу сценылаште хореографий спектакльым ончыкташ  тӱҥалына, газетыште уверым эскерен шогыза. Кеҥежым «Марий Эл» ансамбль тӱнямбал фестивальыш кая, тыгак хореограф-балетмейсер С.Асмаевын лӱмгечыжлан ямдылалтына. Икманаш, лийза мемнан дене пырля! Кӧ концертнам ончен, чылаштлан кугу таум каласена.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: