"Финн-угор тӱня" рубрик, 2014 ий, Вӱдшор тылзын 18-ше кечыже

Мурыжо фильмыште йоҥген

Статьян авторжо Анастасия Эманова

Музык – айдеме чонын йылмыже. Эше философ Платон ойлен: тӱням музык ылыжта, чонлан шулдырым пуа. Иван Белослудцев тидым удмурт мурыж дене ӱшандарыш.

«IB&4CP» группын солистше, удмурт рвезе Иван БелослудцевСамырык рвезе – Удмурт кугыжаныш университетысе удмурт филологий факультетын студентше. Тудо Кез район Александрово селаште шочын-кушкын. «Ончыч музык образованийым налаш шоненам. Но икана школышкына Ижевск университет гыч туныктышо-влак толыныт да филологий факультет нерген каласкаленыт, мыланем оҥайын чучын. Адакшым авамат – туныктышо, кызыт тудо директорын воспитательный паша шотышто алмаштышыже. Чу, шонем, удмурт филологий факультетыш документым пуэн ончем, тунемаш пурен кертам гын, кӱшыл образованиян лиям. Кызыт кумшо курсышто тунемам. Университетысе тӱрлӧ мероприятийыш кумылын ушнем, чолгалыкем ончыкташ, усталыкем вияҥдаш эреак тыршем», — ойла И.Белослудцев.

Иван гитар дене шоктен мошта. «Ты семӱзгар дене шокташ шке гыч тунемынам, негызшым ачам пыштен. Тудат шкеак шокташ тунемын. Такшым ешыштына чыланат музыкым йӧратена. Ача-авамат, акам ден шольымат мурен моштат, — манеш тудо. – Мыйын шкемын группем уло. Тудо «IB&4CP» кужунжо «Иван Белослудцев Чебер пиос» маналтеш. Рушлаш кусараш гын Чебер пиос «Четыре красавчика» лиеш. Кузе лӱмдымӧ шотышто шуко шоненна. Икана выступлений деч вара ӱдыр-влак деч могай йытыра рвезе-влак муреныт манын колна. Тыге «чебер пиос» лийна. Ме концерт дене районлаш лектедена, кафелаште, тӱрлӧ концертыште мурена, а шукерте огыл сольный концертым ончыктенна. 2012 ийыште шагал еҥан калык-влакын Евровиденийыштышт участвоватленна. Тудо Испанийыште эртен. Призовой верым налме огыл гынат, Российын да Одо кундемнан чапшым волтымо огыл шонем. Ты Евровидений сай опыт лийын».

Иван Белослудцев чӱчкыдын шкет мура. Тудын мурыжо «Пузкар» фильмыште йоҥген. «Чаманем, музыкальный образованием уке. Ончыкшым тидым тӧрлаташ шонем. Музык деч посна илен ом керт. Ты аланыште вияҥаш, шочмо йылме дене возымо мурем-влак дене калыкым умбакыжат куандараш тӱҥалам», — каласыш рвезе.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: