"Рубрик деч посна", 2014 ий, Вӱдшор тылзын 4-ше кечыже

Полицийын подполковникше — спорт мастер

Статьян авторжо Татьяна Иванова

Моркышко командировко дене мийыме годым районысо РОВД-шке пурышна. Мыланна палдарышт: полиций подполковник Николай Иванович Багаевым 28 мартыште, Российысе дежурный частьым ыштымылан 96 ий темме кечын,  Республикысе МВД-ын Почетан грамотыж дене палемденыт.

Тыгак Марий Элысе МВД министрын благодарностьшым Евгений Петрович Русановлан кучыктеныт.

БагаевНиколай Багаев политехнический институтышто кӱшыл шинчымашым налын, тунем лекмеке, 1993 ийыште, Морко милиций пӧлкаш толын, тудым Шеҥше ял шотан илемышке участковый милиционерлан шогалтеныт. Тушто кум ий пашам ыштымеке, РОВД-ш ӱжыныт, тыге Николай Иванович экономический преступлений ваштареш кучедалме шотышто пӧлкаште тыршаш тӱҥалын. 2001 ийыште Волжский межрайонный отделыш колтеныт,  налог полицийын пашаеҥже  лийын. Паша карьерже кушмо дене Николай Иванович вашталтын огыл. Тугак, закон дене келшышын, сомылжым шуктен, эре калык коклаште лийын, теве ынде милиций системыште пашам ыштымыжлан — 21 ий.

Волжскышто ты отделым петырымек, Николай Багаев 2003 ийыште уэш Моркышко куснен, экономический преступлений ваштареш кучедалме отделыште 2008 ий марте пашам ыштен.  Криминал пашам виктарыме шотышто начальникын алмаштышыже лийын.  2009 ий годсек дежурный частьыште тырша.

«Дежурный частьын пашаже тыгай:  йыҥгыртыме уверым налына, кеч-могай увер пура, чыла возен кодена, регистрироватлена. Вара верышке лекташ могай вий кӱлеш, тудым чумырена. Мутлан, МЧС але «Вашкеполыш»… Уверым утларак палаш тыршена: кушто, мо, кунам, могай обстоятельстве годым, могай жапыште лийын, кунар жап эртен, преспупленийым ыштыше еҥын иктаж палыжым йодына, икманаш, кунар шуко увер погына, тунар паша писын ышталтеш. Ме информацийым оперативный группылан пуэна,  происшествий лийме верышке колтена. Чылаже дежурный частьыште ныл сотрудник улына», — ойла милиций подполковник.

Николай Иванович – тале спортсмен. Эше политехыште тунеммыж годымак ты лӱмым сулен. 1991 ийыште Краснодар олаште куштылго атлетик дене Российын  чемпионатыштыже 800 метрым куржмаште сеҥен да спорт мастер лийын. Кызытат чыла таҥасымаште вийжым терга.

Кӱкшӧ награде дене полиций пашаеҥым меат саламлена да куштылго огыл пашаште чыла сайым тыланена.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: