"Улам мый Рве-зы-лык!" рубрик, 2014 ий, Вӱдшор тылзын 14-ше кечыже

Самырык годым чолга лийман

Статьян авторжо Анастасия Эманова

- ойла Морко рвезе.

Алексей Степанов Осипсолаш шочын-кушкын. Изинек музык деке шӱман. Тиде ачаже да аваж деч куснен, очыни. Ачаже Юрий Геннадьевич гармонь дене мастарын шокта, аваже Людмила Геннадьевна шке жапыштыже Йошкар-Оласе музучилищым тунем пытарен, Андрей шольыжат баян дене шокта, мура.

Морко район Осипсола ялысе баянист Алексей СтепановАлексей Йошкар-Оласе президентский школ-интернатыште тунемын. Баян дене профессионально шокташ Лидия Елизаровна Смирнова туныктен. «Лидия Елизаровна — моткоч уста специалист, ятыр тунемшыже республикыштына палыме. Тудо йоча-влакым сылнылык тӱня деке шӱмаҥден мошта, усталыкым вияҥдаш полша. Школышто тунеммем годым республикысе семӱзгар конкурсышто участвоватленам, кокымшо верым сеҥен налынам. Тыгай кӱкшытыш туныктышемын полшымыж дене шуын кертынам», — манеш Алексей.

Школ-интернат деч вара А.Степанов И.С.Палантай лӱмеш музыкальный училищыш (кызыт тӱвыра да сымыктыш колледж) калык семӱзгар пӧлкаш баян специальностьлан тунемаш пурен. Тунамсе тунемме пагытым Алексей порын шарналта. «Чыла туныктышына поро да умылышо лийын. Поснак композитор, педагог Сергей Николаевич Морозов шуко улан туныктен, кӱлеш каҥашым эре пуэн. Училищыште спорт дене кылым кучаш утларак тӱҥалынам. Футбол, волейбол, ӱстембал теннис дене модаш йӧратем. Училищысе волейбол командын капитанже лийынам. Тӱрлӧ таҥасымаште участвоватленна, эре икмыше верым налынна», — ойла рвезе.

Алексей 2011 ийыште кидышкыже дипломым налеш, а вес кечынже армийыш кая. Кабардино-Балкарий Республикыште порысшым шуктен. «Армий деч ончыч Йошкар-Оласе ДОСААФ школышто шоферлан тунемынам. Кабардино-Балкарийыште ныл тылзе машинам виктаренам. Вара Йӱдвел Осетийыш кусарышт. Ме, салтак-влак, пел ий курыкышто иленна. Осетийыште тӱрлӧ национальностян еҥ-влак дене палыме лийынам. Ты республикыште пӱртӱс сылне. Туге гынат шочмо кундем деч мотор вершӧр нигуштат уке, — манеш тудо. -Армий гыч пӧртылмеке, МарГУ-со тӱвыра да сымыктыш факультетыш этнокультурный рӱдер вуйлатыше специальностьлан тунемаш пуренам.  А вес ийын факультетым национальный культур да межкультурный коммуникаций институт манын лӱмденыт. Кызыт кокымшо курсышто тунемам. Тӱрлӧ мероприятийыш ушнаш тыршем. Тыгак гитар дене шоктен моштем. Институтна пелен калык семӱзгар оркестр уло. Тушто музыкант-влак арнялан кок гана погынена да репетицийым ыштена, конкурслан ямдылалтына. Теве тиде арнян, кушкыжмын, Озаҥыште «Народные мелодии» IX всероссийский конкурс-фестивальыште участвоватленна. Тушто тӱрлӧ ола гыч нылле утла коллектив погынен. Оркестрна кумшо верым налын».

Рвезе кеч-могай пашам мучаш марте шукташ тырша. Ӱшана, поро пашам шукырак ышташ гын, илышна саемеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: