"Рубрик деч посна", 2014 ий, Вӱдшор тылзын 16-шо кечыже

Спорт дене йолташ лийман

Статьян авторжо Татьяна Иванова

 Йошкар-Оласе 11-ше номеран лицейыште Марий Элын спорт министерствыже Олимпийский урокым эртарен. Тунемше-влак дене спорт министрын алмаштышыже, Марий Элыште спортым вияҥдыме шотышто вице-президент, «Спартак» футбол клуб правленийын председательже Сергей Пименов, пресс-службын секретарьже Елена Иванова да «Спартак» футбол командын вратарьже Валерий Казаков уна лийыныт.

Сергей Павлович  тунемше-влаклан Сочиште эртыше Олимпийский да Паралимпийский модмаш нерген кумдан каласкален, тыгодымак презентацийым ончыктеныт.

«2013 ий 23 февральыште  ООН-ын генеральный ассамблейже  6 апрельым Тӱнямбал спорт кече семын палемдаш темлен Российысе Олимпийский комитет чыла регионышто кумшо ий почела урок-влакым эртара. Российыште эртыше Олимпиаде мыланна ик эн кугу паша да пайрем лийын. Чыланат шкенан спортсменна-влак верч тургыжланенна, сеҥымашыштлан моткоч куаненна.

В. КазаковОлимпиадын шке символжо, флагше, девизше улыт. Символлан вич тӱсан оҥгым шотлат. Тиде вич континентым ончыкта: ужарге — Австралий, йошкарге  Америка, шеме Африка, пелганде Европа, нарынче Азий. Флагым 1920 ийыште кучылташ тӱҥалыныт. Тудо куснылшо, Олимпиадым эртарыме элышке кая. Ныл ий гыч, 2018 ийыште, телымсе Олимпиаде Корейысе Пхёнчхан олаште лиеш. Олимпиадын девизше тыгай: писынрак, кӱшкырак, виянрак. Тыгак Олимпийский аклымаш шомак уло. Тиде  спортсмен-влак коклаште икте-весым пагалымаш, аклымаш лиеш. Шкем пӱтынек сеҥымашлан ямдылымаш, вийым чаманыде тыршымаш ончыко наҥгаят. Спортышто калык-влак кокласе келшымаш йомшаш огыл.

Олимпиаде кайыме пагытыште античный тӱняште чыла сар чарнен, уло калык спортсмен-влакын таҥасымашыштым эскерен.

Тений телымсе Олимпиадыште 98 комплект награде модалтын, 88 эл гыч спорстмен таҥасен, чылаже 4 миллиард еҥ тӱрлӧ йӧн дене Олимпиадым ончен. Марий Элымат Олимпиадын тулжо 28 декабрьыште авалтен. 70 факелоносец 14 меҥгым куржын. Нунын коклаште мыламат лияш пиал шыргыжалын. Йоча-влак, спорт дене изинек кылым кучыза. Тымарте  нимогай клубыш, школыш, секцийыш возалтын огыдал гын, эше чылажат — ончылно. Йошкар-Олаште ятыр спорт объект улыт. Тушто омса эре почмо. А таче тыланда Олимпийский урокым «Спартак» футбол клубын вратарьже Валерий Казаков эртара. Спортзалыште тудо икмыняр упражнений-влакым ончыкта», — палдарыш Сергей Павлович.

Марий Элыштына хоккей школ уло, тудо Российын первенствыштыже вийжым терген. Тыгак фигурный мунчалтымаш школ вияҥын толеш. Марий Элысе Ий полатыште 5-ше гана почела синхронно фигурный мунчалтымаш дене Российын чемпионатше эртен, толшаш ийынат тыгай кугу таҥасымаш мемнан дене лиеш.

Тылеч ончыч Валерий Казаков шкеж нерген изиш палдарыш да тунемше-влакын йодышыштлан вашмутым пуыш. А йодыш-влак оҥай улыт ыле. Мутлан, школышто кузе тунемын, могай тӱс келша, мом кочкеш, талисманже уло мо да тулеч молат.

Валерий Казаков 1982 ийыште Волжск олаште шочын, 6-шо номеран школым тунем лектын. Вара Марий пединститутышто  физкультур да спорт факультетыште кӱшыл шинчымашым налын. Индеш ияшыж годым футболым ойырен. Рвезе школысо,  вара Волжск оласе сборныйлаште модын, тушеч «Диана» (Волжск) командышке логалын. Уста спортсменым «Спартак» (Йошкар-Ола) командышке налыныт.  Ынде визымше ий ты командыште модеш.  Йӧратыме тӱсшӧ – йошкарге. «Мыйын кочкышыштем пакчасаска, фрукт, шӧр-торык  лийшаш улыт. Йӱдлан кочкын ом воч, тыландат ом темле. Эр кочкышым эре ыштыман, пучымышым кочман», — мане тудо.

Валерий Казаков «Спартак» командыште модмо деч посна кушкын толшо тукымым футболла модаш туныкта. Тренерын йоча спорт школышто кок группыжо уло. Ты школын кок воспитанникше — Геннадий Киселев ден Константин Шамаев — Тольяттисе Россий футбол академийыште тунемыт. Нунын Олимпийский сборныйыш да модмашке логалаш чылажат уло», — палдарыш уста вратарь В.Казаков.

Тыгай вашлиймаш икшыве-влакын кумылыштым волгалтарыш, а спортзалыште ыштыме упражнений деч вара вий-куатышт ешаралте. Спорт – тиде илыш, тазалык. Туддене йолташ лийман.

«Спартак» футбол клуб нерген кӱчыкын

2009 ийыште «Спартак» Российын первенствышкыже угыч пӧртылын, «Приволжье» зонышто 5-ше верым, 2010 ийыште кокымшо верым налын, тыге  Российын первенствыжын финалышкыже логалаш путевко логалын. 2011-2012 ийлаште «Приволжье» зонын кубокшым сеҥен налын, шӧртньӧ медаль дене палемдалтын. 2012-2013 ийлаште профессионал семын палемдалтын, ынде кокымшо дивизионышто — «Урал-Поволжье» -зонышто модеш.

Т. Иванова.

Е.Иванован фотожо-влак.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: