"Сылнылык тӱня" рубрик, 2014 ий, Вӱдшор тылзын 25-ше кечыже

Тӱрым тӱрлымӧ йыдал тодмо гай огыл

Статьян авторжо Анастасия Эманова

Тӱрлымӧ паша мастарлыкым, чытышым йодеш. Звенигово оласе калык мастар-влакын пӧртышт пелен «Марий национальный тӱр» студий уло. Тудым Надежда Евсеевна Майкова вуйлата. 

Звенигово оласе калык мастар-влакын пӧртышт пелен «Марий национальный тӱр» студийын вуйлатышыже Надежда МайковаТудо шке жапыштыже Йошкар-Оласе «Труженица» фабрикыште тӱрлызылан тунемын. «Эн ончыч ургызылан тунемнем ыле, но тушко вер лийын огыл, садлан тӱрлызылан каенам. Тушто мемнам уста кидмастар Лилия Александровна Орлова туныктен. Ты пашам чот йӧратен шынденам. Тӱрым тӱрлен, чонем кана, кумылем нӧлталтеш», — ойла Н.Е.Майкова.

 «Студийыштына марий тӱрым аралаш тыршена, садлан тошто тувыр тӱрым ончен, у куэмыш тӱрлена. Тыге Звенигово районысо марий-влакын тӱрлеман тувырыштым ургенна. Тыгак моло районысо да ӧрдыж велыште илыше марий-влакын тувырыштымат ыштена. Угарман да Киров областьласе тӱрлеман тувыр-влак улыт. Ӱмаште «Марий вургем пайрем унала ӱжеш» регионысо фестивальыште мастарлыкнам ончыктенна. Тушко нине областьлаште илыше марий-влакын национальный костюмыштым ямдыленна. Фестивальыште лауреат лийынна, — манеш кидмастар. – Тувыр-влак ойыртемалтше улыт. Мутлан, Киров марий-влакын пайрем тувырышт ош тӱсан гын, сӱан вургемышт – шеме. Угарман вел тувыр Медведево районысо марий-влакын национальный костюмыштым ушештара. Тушто марий-влак сорокам шындат. Тыгак тӱрыштышт кайык символ уло. Ончыкшым Урал, Свердловск марий-влакын костюмыштым шымлен тӱрлаш шонена».

Студийыште йоча-влакымат туныктат. «Ӱдыр-влак коклаште тӱрым тӱрлаш тунемаш кумылан-влак шукын улыт. Но икмыняр занятий деч вара южыштын тиде пашам ыштымышт ок шу. Йоча-влакым салфеткым, ӱстембалшовычым тӱрлаш туныктена. Тунемшем-влак ончыкшымат ты пашам огыт шу, мастарлыкыштым эреак вияҥдат. Мутлан, Светлана Мурзаева чаплын тӱрла, шуко конкурсышто сеҥен. А вес тунемшем Наиля Мингазова 15 ияшак Олык Ипай лӱмеш национальный премийын лауреатше лийын», — ойла тудо.

Студийын заказше шуко. Культур пашаеҥ-влак, марий йылмым да литературым туныктышо-шамыч марий тувырым йодыт. «Йот эл гыч толшо турист-шамычат пеш налнешт, да уто уке. Кеч-могай кидпашалан ятыр жап кӱлеш. А марий тӱрым пырчым шотлен тӱрлыман. Ик тувырым йӱдшӧ-кечыже тӱрлаш гын, кум тылзе гыч ямде лиеш, очыни, — каласыш кидмастар. — Шуко вере миен коштына, тӧрлӧ район выставкылаште кидпашанам ончыктена, мастер-классым эртарена. Мордовийыште, Удмуртийыште, Комиште, Татарстаныште лийынна. Ятыр  грамотна уло. 2000 ийыште Москошто Тӱнямал икымше дельфийский модмаш эртен. Тушто шке мастарлыкыштым искусство пашаеҥ-влак ончыктеныт. Мероприятий шуко номинаций дене эртен. Ме «Народные промыслы» номинацийыште нылымше верым налынна. А чылаже тушко 27 эл гыч кидмастар-влак лийыныт. Студийна кажне ийын оҥай деч оҥай пашам ыштен шога. Ме марий тӱрым арален кодымо да вияҥдыме верч тыршена».

Кӱлешан пашам шуктен шога «Марий национальный тӱр» студий. Мастар-влак тӱрышт дене кугузе коча-кованан йӱлаштым пойдарат, самырык ӱдыр-влакым пашам йӧраташ да чытыше лияш туныктат.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: