"Сылнылык тӱня" рубрик, 2014 ий, Вӱдшор тылзын 4-ше кечыже

Эх, воштылтышт вет!

Статьян авторжо Анастасия Эманова

Кодшо рушарнян Ленин лӱмеш тӱвыра полатыште «Воштылаш, товатат, сулык огыл!» мыскара конкурс эртен. Тушто республикысе тӱрлӧ район, эсогыл Пошкырт кундем гыч марий-влак шке мастарлыкыштым ончыктеныт. Чылаже 18 номер лийын. Калык зал тич погынен. Тудын кумылжым участник-влак веле огыл, вӱдышӧ-шамычат: Сергей Карпов ден рауль Гарифулин – оҥай мыскарашт дене нӧлтеныт.

Выступлений-влакым  ончаш оҥай лийын.

В.Кудрявцев, "Кол грипп" сценкеМишкан села гыч Родион Плотниковын «У ий монча» мыскараже шинчавчӱдымат эсогыл луктын. Оршанке район гыч Виталий Кудрявцевын «Кол грипп» номерже экологий проблемым нӧлталын.

Морко калык театр каҥгешташ «Рецептым» темлен. Мишкан кундем гыч Эдуард Байгазов «Диспансеризаций» дене палдарен. Вера Горохова «Хобот» мыскараж дене чот воштылтен.

Сценке-влак деч посна калыкым Виктор Комаровын, Вячеслав Осиповын, Сергей Байназовын, «Весе кова-влак» ансамбльын мыскара сынан мурышт куандарен.

Морко, Волжский, Оршанке, Советский, У Торъял да Звенигово районласе коллектив-влак, Пошкырт кундем, Мишкан селасе «У илыш» калык театр мастарлыкыштым ончыктеныт.

А пытартышлан «Канде кава» группо икмыняр мурым мурен. Весела сем калыкым верже гын кынелтен да кушташ таратен.

В.Мочаева ден В.Ефремова, "Вате толын" сценкеЖюрилан эн уста да оҥай номерым ойыраш неле лийын. Иктат ӧрдыжеш кодын огыл, кажныже «Мастарлыкым ончыктымылан да «Кугарня» газет дене кылым кучымылан» диплом да шерге пӧлек дене палемдалтын.

Жюрин спецпризшат лийын. Тудым мурызо Раиса Данилова «Натурель саун» номержылан налын.

3-шо верым Морко район Изи Кушна гыч коллектив «Ораде Тайра» номержылан налын. Тудлан дипломым да мультиваркым кучыктымо.

2-шо верым да электромясорубкым Мишкан села гыч Родион Плотников сеҥен налын.

Мыскара конкурсышто Волжский район Корамас гыч «Чоткар тукым» коллектив «Йочасадыште» сценке дене сеҥен. Коллективлан дипломым да плазме телевизорым кучыктымо.

А ме, мыскара пайремыш толшо-влак, чыла участниклан весела кумылыштлан да оҥай сценкым ончыктымыштлан тауштена.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: