"Сылнылык тӱня" рубрик, 2014 ий, Ага тылзын 9-ше кечыже

Атлас тасма гыч – сылне пеледыш

Статьян авторжо Анастасия Эманова

Анна Гурьянова изирак клааслаште тунемше йоча-влакым туныкта. Яра жапыштыже кидпашам ышташ йӧрата.

Советский поселко школын туныктышыжо, кидмастар А.Гурьянова«Педколледжыште шукылан тунемынам. Туныктышо профессийын кӱлешлыкшым сайынрак умыленам. Изи йоча-влакым туныкташ, нунылан кӱлеш ой-каҥашым пуаш — пеш кугу ответственность, — ойла А.Гурьянова. – Педколледж деч вара Морко район Азъял школышто пашам ыштенам. А марлан лекмеке, Советский поселкыш кусненам. Тушто 2-шо №-ан школышто пашам ышташ тӱҥалынам, вара «Сказка» йочасадыш пашам ышташ кусненам. А кызыт угыч школыш пӧртылынам. Икымше класслан вуйын шогем».

Анна атлас тасма гыч тӱрлӧ сылне заколкым, алгам ышта. «Кидпашалан кокымшо йоча дене отпускышто лиймем годым кумылаҥынам. Ӱдырем йочасадыште лийын, садлан пӧртсомылкам ыштен пытарымек, интернетыште тӱрлӧ материалым шымленам. Икана шинчамлан шке кид гыч ыштыме сылне пеледыш пернен. Ик сайтыште тыгай пеледышым ыштыме шотышто мастер-классым кычалын муынам. Пеш келшыш. Шке ыштен ончаш кумылем лекте. Ты кидпашалан жап шуко огеш кӱл. Ик кечыште 5-6 пеледышым ышташ лиеш. Тыгак модульный оригами деке шӱман улам. Авамлан кагаз гыч кок йӱксым, вазым да павлиным ыштен пӧлекленам. Пытартыш жапыште «цумами канзаши» технике сымыстарен. Атлас тасма гыч тӱрлӧ бантикым, заколкым, фотокартычкылан рамкым да тулеч молымат ышташ лиеш. Пеш куштылго да мотор. Тиде технике дене ыштыме ик пашамат мӧҥгыштӧ уке – чыла пӧлекленам».

Анна Гурьянова чыла кидпашашкыже чон шокшыжым пышта. Кумылын пӧлекла. Йодыт гын, кидпашалан туныктенат кертеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: