"Рубрик деч посна", 2014 ий, Ага тылзын 26-шо кечыже

Илышлан куанен мошта

Статьян авторжо Анастасия Эманова

Муро – калыкын чонжо. Пытартыш жапыште марий сем тӱняште шуко у лӱм шочын. Нунын кокла гыч самырык ӱдыр Ксения Юркина поснак палыме. Тудын мурыжо-влак ныжылге улыт, утларакше – йӧратымаш нерген.

Звенигово район Эсмекпляк села гыч мурызо Ксений ЮркинаЯндар йӱкан ӱдыр Провой кундем Эсмекпляк селаш шочын. Школышто тунеммыж годым спорт дене пеҥгыде кылым кучен, талын куржталыштын, вийжым тӱрлӧ таҥасымаште терген. Но илышыжым ӱдыр спорт дене огыл, а сылнылык тӱня дене кылдаш шонен. 9 класс деч вара И.С.Палантай лӱмеш тӱвыра да сымыктыш колледжыш калык семӱзгар пӧлкаш тунемаш пурен. Колледжыште тунемме деч посна Ксения «Югорно» бард клубыш коштын. «Бард клубышто самодеятельный композитор Александр Мамаев дене палыме лийынам. Тудын ик мурыжо пеш келшен. Тудым коктын мураш утларак келшен толеш шоненам да ик палыме рвезым, Дмитрий Конаковым, ӱжынам. Тудо тунам тыгак колледжыште тунемын. Тыге «Йӧратет гын, умылет» икымше мурына шочын. Тудо ару, ныжылге йӧратымаш нерген. Шонем, ик еҥат ты волгыдо шижмаш деч посна илен ок керт. Кажнын шке шӱм пелашыже лийшаш. Йӧратыше веле илышлан куанен мошта», — манеш мурызо.

Тиде дуэтым марий калык йӧрата, мурыжо-влакым шулен колыштеш. «Репертуарыштына Александр Мамаевын, Сергей Милютинын мурыжо-влак улыт. Ӱшанем, лишыл жапыште Эсмекпляк селасе самодеятельный композитор Анатолий Яковлевын мурыжым йоҥгалтарена, — ойла К.Юркина. – Кызыт дуэт дене сценыш шагал лектына. Мый Эсмекпляк тӱвыра рӱдерыште пашам ыштем, а Дима Йошкар-Олаште ила. Садлан пытартыш жапыште чӱчкыдын шкет мурем. Ик эн йӧратыме мурем – «Шулдырем». Тудо весела, кумылым нӧлтышӧ. Семже – татар композитор Жаудат Гильмановын, мутшо – Вера Гордееван. Нунылан кугу таум каласем».

Самырык мурызо тӱрлӧ конкурсыш кумылын ушна. Мастарлыкшым эреак вияҥда. «Конкурсышто шкемым тергаш келша. Ӱмаште «Мари краса» моторлык конкурсышто лийынам. Тушто 9 ӱдыр усталыкшым ончыктен. Мый 3-шо верым сеҥен налынам, — манеш тудо. – Звенигово районысо тӱрлӧ ялыш концерт дене коштына. Телым гастроль дене Пошкырт велыш миенам. Калык поро, шокшын вашлийын. Йошкар-Олаштат концертыште мураш йодыт. Тыгак клуб пелен «Олык сем» калык фольклор ансамбльыш коштам. Тудым Зинаида Даниловна Кушакова вуйлата. Кызыт эше кӱшыл образованийым налам. МарГУ-со Национальный культур да межкультурный коммуникаций институтышто заочно тунемам».

Ксениян тӱҥ эҥертышыже – еш. Ачаж ден аваже, изаже кугу кӱкшытыш шуаш кумылаҥден шогат, кажне концертышкыже мияш тыршат. «Еш мыланем эн шерге. Авам мӧҥгыштӧ сурт сомылкам ышта, ачам асфальт корным ачала. Нуно мемнам шукылан туныктеныт. Шӱм шокшыштым пуэныт», — таушта ӱдыр.

Сылне муро чоннам луштара, илышнам сӧрастара. Уста мурызо кажне мурыжым шижын моштышаш, чонжо гоч колтышаш. Ксения ончыкшым калыкым у муро-влак дене куандараш ямдылалтеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: