"Сылнылык тӱня" рубрик, 2014 ий, Ага тылзын 19-ше кечыже

«Йоча-влаклан куаным кондаш – пиал», — манеш артистке А.Деркач

Статьян авторжо Анастасия Эманова

Курчак театрын самырык артисткыже Анна Деркач сценыште модмыж годым кеч-могай йочам шке векыже савырен кертеш. Весела кумылан, арава чуриян ӱдыр йырым-йырже волгыдым шара. Тудын модмо герой-влак оҥай, ойыртемалтше койыш-шоктышан улыт. Йоча спектакльым ончаш толшо икшыве веле огыл, ача-ават тудлан ӱшанат.

Спектакль "Остров сокровищ", Анна покшелнеАнна И.С.Палантай лӱмеш тӱвыра да сымыктыш колледжысе театр пӧлкам тунем пытарен. «Мемнам актер мастарлыклан уста педагог Татьяна Валентиновна Лядова туныктен. Драме театрын артистше лияш ямдылалынам, но студенткем годым курчак театрыште практикым эртен. Курчак-влак мыйым изинек сымыстареныт. Теве шып, тарванылдыме курчак артистын кидыштыже пуйто илана: шӱла, кушта, мура…

Эше тӱҥалтыш класслаште чолгалыкем ончыкташ тыршенам. А тунемынам Йошкар-Оласе 14-ше №-ан гимназийыште. Кокымшо классыште рвезе-влакым 23 февраль пайрем дене оҥай пӧлек дене саламленам. Шкеак йоча пьесым возенам да курчакым ыштенам. Тыгак эстраде миниатюр театрыш коштынам, — ойла ӱдыр.

Колледжыште преподаватель-влак Аннан талантшым да пашам йӧратен ыштымыжым вигак ужыныт. Нылымше курсышто тунеммыж годым курчак театрын директоржо В.А.Кузнецов тудым да ик рвезым пашашке ӱжын. «Ме келшенна. Лачак тунам театрыш Санкт-Петербург гыч режиссер Артем Макеев толын ыле. Ме «Как пройти в Вифлеем» спектакльым шынденна. Тушто мый тӱҥ рольым модынам. Кеч-могай артистлан икымше роль эн шерге, но тыгодымак эн неле. Кызыт ты рольым вес семын модам ыле шонем, — манеш тудо. – Вес оласе театрышкат пашаш ӱжыныт. Теве, мутлан, студент годымак Бугульма гыч режиссер Владимир Юрьевич Пряхин толын ыле да студент-влакым шке драме театрышкыже ӱжын. 8 ӱдыр-рвезе келшенна. Но пел ий гыч тӱрлӧ амаллан кӧра мый мӧҥгеш Йошкар-Олаш пӧртылынам. Паша деч посна шуко шинчен омыл, угыч курчак театрыште тыршаш тӱҥалынам. Тыгодым Санкт-Петербургысо театрльный искусство академийыш курчак театрын артистше специальностьлан тунемаш пуренам. Ӱмаште дипломым налынам».

Артист геройжо-влак дене шкежат тургыжлана, куана, ойгыра. Рольжо оҥай лийже, шарнымашеш кодшо манын, уло шӱм шокшыжым пышта. «Кеч-могай спектакльым шындыме годым вий кӱлеш. Нимоат куштылгын ок шоч. Южо спектакльыште артист-влаклан иканаште икмыняр рольым модман. Ик образ гыч весыш кусныман. А тиде куштылгыжак огыл. Курчак театрнан репертуарже моткоч поян да оҥай. Чаманен каласыман, Россий кӱкшытан  фестивальлаште мастарлыкнам огына ончыкто, манаш лиеш. Ӱшанем: ончыкшым республикын чапшым Россий, тӱнямбал фествиальыште аралена да ончыктена, могай Марий кундемыштына уло сай курчак театр. Вашке театрна у чапле полатыш кусна. Тидыже моткоч куандара», — каласыш А.Деркач.

Курчак театр республикысе конкурсыш эре кумылын ушна. Ятыр наградыже уло. Тений курчак театр «Театральный Йошкар-Ола» Анна Деркач «Курчак театрыште эн сай роль» номинацийыште «Жак и его слуга, или Как стать людоедом» спектакльыште Люций пырысым модмыж дене сеҥен.

«Награде, конешне, сай. Но ме эн ончыч йоча-влаклан куаным кондаш тыршена. Гастроль дене районлашке лектына. Вашке Звенигово районышто «Перекресток» спектакльым ончыктена. Йоча-шамычым корно правил дене палдарена», – шыргыжалын каласыш артистке.

Анна мураш, велосипед дене кудалышташ йӧрата, спорт дене пеҥгыде кылым куча. «Яра жапыште зумба, калланетика дене заниматлем. Такшым спорт деке изинек шӱман улам, ияш йӧратем, вара – куштылго атлетике дене. Тыгак музыкым колышташ, книгам лудам. Эн йӧратыме писателем – Ремарк. Тудын произведенийже-влак шонаш таратат, илышлан келшыше улыт, — манеш А.Деркач. – Курчак театрыштына коллектив сай, умылышо. Артист паша неле. Талантлан эҥертен, пашам йӧратен ыштыман. Конешне, пашаште тӱрлыжат лиеш. Но нелылыкым сеҥаш ешем полша. Ача-авам артист профессийым ойырымемлан ик ганат вурсен огытыл, нуно палат: театр мыланем юж гай».

Самырык артистке Анна Деркач кызыт йоча йомакым воза. Кӧ пала, ала жап эртымеке, тудын пьесыж почеш спектакльымат шындат. ӱшанен кодына!

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: