"Рубрик деч посна", 2014 ий, Ага тылзын 26-шо кечыже

Канаш але пашам ышташ?

Статьян авторжо Анастасия Эманова

Кеҥеж – пӱртӱсын пеледме жапше. Кеч-кӧлан ты шокшо пагытыште сайын чучеш.  Сылне пӱртӱс канаш ӱжеш. А мурызына-влакын канаш жапышт уло мо?

Ирина Юшкина:
- Кеҥежым моткоч йӧратем. Йырым-йыр чыла тӱзланыше, ужарге, сылне. Кушко от ончал — пеледыш-влак шинчам йымыктарат. Сад-пакчашке шкежат шуко тӱрлӧ пеледышым шындылынам. Олыкысо пеледыш-влак келшат. Кеҥежым куэрлаште ӱдырем дене коктын шӱшпык мурым колышташ, вӱд воктек кошташ йӧратена. Тений шокшо пагытыште Санкт-Петербургыш миен толаш кумыл уло. Кызыт Пайскырык тӱвыра пӧртыштӧ пашам ыштем. Тусо уста коллектив дене тӱрлӧ фестивальыште, концертыште выступатлаш ямдылалтына. Теве 20 июньышто Медведево районышто этнодискотеке лиеш. Ме тудым эртарена.

Роза Искакова:
- Кеҥежым паша шуко. Калык усталык рӱдерна июньышто шым кугу мероприятийым эртара. Кызыт тудлан ямдылалтына. Кеч-могай концертыш мураш ӱжыт гын, кертмем семын келшем. Вет муро – илышем. Чон мураш ӱжеш гын, калык йодеш гын, торешланаш намыс.

Артур Ефремов:
- Кеҥеж шуэш веле, садлен ончылгоч мо лийшашым раш але ом пале. Гастроль дене Пошкырт кундемыш миен толман. Крымыш канаш каяш шонымаш уло. Кеҥежым еш дене пӱртӱс лоҥгаште канаш сай. Поснак ялысе юж пайдале.

Эльвира Попова:
- Кеҥежым шӱм вургыжын вучем. Чевер кечын ниялтмыжым йӧратем. Эҥер воктене кияш, кечеш кӱаш могай ласка! Тений тора велыш каяш ом шоно, шочмо кундемыштак канем. Марий Элна курорт гаяк. Эн чот «Лесная сказка» санаторий воктенысе ер да Юл воктене канаш йӧратем. Гастроль дене кеҥежым коштмаш уке. Концертыште мураш ӱжыт гын, келшем.

Надежда Пашкина:
- Ты кеҥежым утларак пашам ыштем. Июнь кыдалне Марий самырык театр дене гастроль дене Уралыш кудалына. Тыгак Финляндийыш пашам ышташ каем. Йот элыште канаш жапым муам шонем, тусо калык дене палыме лиям, вер-шӧрыштым шымлем. Икманаш кумылымат нӧлтем, пайдамат ыштем.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: