"Улам мый Рве-зы-лык!" рубрик, 2014 ий, Ага тылзын 9-ше кечыже

Ныл гармоньжо уло

Статьян авторжо Анастасия Эманова

Гармонь сем почеш чон мураш йодеш, йол тавалташ ӱжеш. Арам огыл ончыч тале гармонистым ялыште икымше качылан шотленыт. Ковам самырык жапшым шарналтен тыге ойла: «Чыла сомылкам ыштен пытарымеке, кастене ӱдыр-рвезе-влак погынена да гармонь сем почеш мурым мурена ыле, чоннам луштаренна, кумылнам нӧлтенна». Кызыт, чаманен каласыман, гармонь сем пайрем годым веле шокта.

Киров область Вятские Поляны гыч гармонист Стас ДонскихКиров марий Станислав Донских гармонь деч посна иленжат огеш керт. Тудын мутшо почеш, тӱрлӧ семым шоктен, калыкын койыш-шоктышыжым палаш лиеш.

Самырык гармонист Киров область Вятские Поляны олаш шочын. Ачаж ден аваже кум икшывым ончен-куштеныт, Стас – кугуракше. «Мӧҥгыштӧ ача ден ава марла кутырат. Чаманен каласыман, ме марла сайын ойлен огына мошто, но чыла умылена», - ойла рвезе.

С.Донских Удмурт кугыжаныш университетысе физико-энергетический факультетыште кокымшо курсышто тунемеш. Университет пеленсе «Чипчирган» фольклорно-этнографический ансамбльыш коштеш, баян да гармонь дене шокта. «Гармонь дене ачам шокташ туныктен. Кочамат шоктен моштен. Мӧҥгыштына ик баян да ныл гармонь улыт. Кодшо кеҥежым тӱрлӧ пашам ыштенам да, оксам ситышын поген, шкаланем гармоньым налынам, манеш С.Донских. – «Чипчирган» ансамбльыште кок гармонист уло. Репертуарна поян, утларакше куштымаш номер-влак улыт. Художественный вуйлатышына Ирина Вячеславовна Пчеловодова сценыште шкем кузе кучаш туныкта, удмурт калыкын тӱвыраж дене палдара. Ме тӱрлӧ конкурсыш, фестивальыш коштына. Ятыр наградына уло. Концерт дене шуко олаш миенна. Тидыже самырык еҥлан оҥай да пайдале».

Рвезе музыкым спортым йӧрата. Ончыкшым чыла студент гаяк университетым сайын тунем пытарынеже. «Армийыш миен толман, а умбакыже илыш ончыкта»,- ойла тудо.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: