"Сылнылык тӱня" рубрик, 2014 ий, Ага тылзын 30-шо кечыже

Тыште революционер илен

Статьян авторжо Анастасия Эманова

Звенигово оласе краеведческий тоштер руш манмыла «уникальностьшо» дене ӧрыктара. Тыште могай гына экспонат уке: исторический документ, мамонтын лужо ден бивеньже да молат. Тоштерын директоржо — Виктория Анатольевна Музурова.

Звенигово районысо краеведческий тоштер- Тоштерым 2008 ийыште почыныт. Зданий моткоч тошто. Тудым эше 1860 ийыште чоҥымо. Тоштерын пырдыжыштыже латыш революционер Христофор Саулитислан пӧлеклалтше шарнымаш оҥа кеча. Тудо Звениговышто, тунам эше поселкышто, большевистский кружокым почын. Вара тыштак йоча библиотек лийын, 1963 ий гыч «Передовик» районысо газетын редакцийже верланен, а 1982 ий гыч – районысо образований пӧлка, - ойла директор. – Тоштер кугу пашам шуктен шога. Ме тӱрлӧ мероприятийым, научно-шымлыме пашам эртарена. Фонднам эреак пойдараш тыршена, тачылан 8 тӱжем утла экспонат уло. Кажне ийын кок конференцийым: «История и культура: от прошлого к настоящему» да Сеҥымаш кечылан пӧлеклалтше «Чтобы помнили», тыгак «Тоштерыште йӱд» акцийым да Жибрик лудмашым эртарена. Кызыт районын 90 ияш лӱмгечыжлан ямдылалтына, тудлан пӧлеклалтше выставкым ыштена. Тылеч посна экспедицийыш чӱчкыдын лектына. Район мучко оҥай материал-влакым погена».

Марий калыкын илыш-йӱлажым ончыктышо экспозицийТоштерыште эн оҥай экспонат – тошто водолазный костюм. «Республикыште тыгайже ик тоштерыштат уке. Костюмым мыланна Бутяков лӱмеш судостроительно-судоремонтный завод пӧлеклен», — ойла В.Музурова.

Ты тоштерыш йоча-влак кошташ йӧратат. Тушто оҥай да шкешотан экспонат-влак улыт. Тоштер пашаеҥ-влак шкештат школлаш лектыт, тӱрлӧ мастер-классым эртарат. «Выездной туризм моткоч виян. Ме икшыве-шамычым республикысе тоштерлаш, оҥай верлаш коштыктена. Козьмодемьянскыште, Йошкар-Олаште, Озаҥыште, районлаште лийынна. А пристань лиеш гын, турист-влак шукырак толыт ыле, шонем», - манеш директор.

"Марий кундемыште илыше янлык-влак" экспозицийСпециалист-влак кажне семинарыш, курсыш коштыт, шинчымашыштым келгемдат, опытым погат. «Пытартыш гана Медведево школысо археологий тоштерыште лийынна. Такшым Евсеев лӱмеш Национальный тоштерыште семинар, конференций-влак утларак эртат», — каласыш В.Музурова.

Тоштер Звенигово районысо калыкын илышыж дене палдара. Тушто акрет годсо шуко ӱзгарым ужаш лиеш. Тыгак традиционный тувырым, фотодокументым, самодеятельный художник-влакын сӱретыштым чумырымо. Выставочный зал-влак ик кечат яра огыт лий. Тоштер калыкын поянлыкшым, кугезе коча-кова-влакын ыштыш-кучышыштым арала да самырык тукымым пагалаш туныкта.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: