"Сылнылык тӱня" рубрик, 2014 ий, Сорла тылзын 25-ше кечыже

Изи рольжат шарнымашым кода

Статьян авторжо Анастасия Эманова

Артистке Наталья Ивановна Кораблева Марий самырык театрыш 23 ий ончыч толын. Тиде жапыште шуко рольым модын, кажныже шкешотан да оҥай. Театрыште Наталья Ивановналан изирак роль-влакым утларак ӱшанат. Артистке геройжо дене пырля шортеш, воштылеш, ойгыра, куана. Чыла шижмашым шӱмжӧ гоч колта, айда-лийже ок мод.

Марий самырык театрын артисткыже Наталья Ивановна Кораблева "Воштылаш, товатат, сулык огыл!" мыскара конкурс годымН.И.Кораблева Шернур район Кугу Шокшем ялыште шочын-кушкын. Ачаже Иван Александрович 16 ий озанлык вуйлатыше лийын, вара фермыште пашам ыштен. Чаманен каласыман, вич ий ончыч ӱмыржӧ кӱрылтын. Аваже Зоя Михайловна ятыр ий ужалышылан ыштен. Кызыт сулен налме канышыште. Кораблевмыт вич ӱдырым йолымбак шогалтеныт, сай образованийым пуэныт, пашам йӧраташ туныктеныт.

Наталья, шочмо ялыштыже 8 классым тунем пытарымеке, Мустай школыш куснен. Изинек кушташ-мураш йӧратен гынат, 11 класс марте артистке лияш шонен огыл. “Йоча-влакым туныктымем шуын, садлан Крупская лӱмеш пединститутыш филологлан тунемаш пурынем ыле. А латикымше классыште тунеммем годым Йошкар-Оласе Палантай лӱмеш музык училищыште актер пӧлкаш конкурсым увертарыме нерген колынам. Чу, шонем, миен толшаш. Адакшым мыйын акам Сеҥымашын кумлымшо идалыкше лӱмеш тӱвыра полат пеленсе калык театрыште модын. Мый тудын репетицийышкыже чӱчкыдын коштынам. Оҥай, а вет изиэм годым артист-влак сценыш репетиций деч посна иканаште модаш лектыт манын шоненам, — ойла артистке. — Училищыш тунемаш пураш конкурс кугу лийын. Кум турым эртыман. Кажныштыже мастарлыкым ончыктыман. Икымше турым эртышым, кокымшым. Пытартышлан шагалын гына кодынна. Юмылан тау, пурен кертынам”.

Наталья Ивановналан пӱртӱс сылне, яндар йӱкым пуэн. Арам огыл, очыни, тудын аважат, ака-шамычшат мурат. “Авам шке жапыштыже клуб вуйлатыше лийын. Тушто тудо мурышо да куштышо ансамбльым чумырен. Мый тушко коштынам. Школыштат тӱрлӧ куштымаш кружокыш кумылын ушненам, хорыштат муренам. Ончыч, шарнем, фермыш концертым ончыкташ коштынна. Такшым кеч-могай пашам мурым мурен ыштем. Изирак годым чодыраште поҥгым, олыкышто снегым погымо годым, ломбо вуйышто мурем ыле. Тунам “Мираж” группын, Юрий Шатуновын мурышт чонемлан лишыл лийыныт. Кызыт кажне пайремыште кум йӱк дене мурена. Мый Дина акам дене икымшым налына, Люда акам — кокымшым, авам — кумшым. Руш, марий, калык мурым мурена, чоннам луштарена”, - мут мундыражым умбакыже ронча Н.Кораблева.

Артистке пырля тунемше йолташыже-влак дене училищыште икымше курсышто тунеммыж годымак гастроль дене Пошкырт, Урал, Свердловск кундемлаш коштын. “Кызыт тора кундемыш автобус денат миен толаш лиеш. А тунам поезд дене веле коштынна. Ялысе еҥжылан тидыже поснак оҥай лийын. Калык мемнам эре порын вашлийын, зал тич лийын. Кызыт самырык еҥ-влак театрыш шуэнрак коштыт.

Ме тунемынна да тунамак Марий самырык театрыште пашам ышташ тӱҥалынна. Преподаватель-влак уста лийыныт, мемнам шукылан туныктеныт. Поснак Олег Геннадьевич Иркабаевым, Валерий Помбеевич Григорьевым, Раиса Михайловна Алексеевам, Августа Владимировна Романовам палемдынем. Нуно мыланна кокымшо ача да ава гай улыт.

Студент пагыт поро шарнымашым коден. Ме жапым арам эртарыме огыл: тунемме, пашам ыштыме. Стипендийым налме, пашадар тунамсе пагытлан пеш кугу лийын. Тидлан кӧра ӱдыр-шамыч дене тӱшкагудышто кочкаш шолтымат огыл, кафеште эре кочкынна. Кинотеатрыш чӱчкыдын коштынна”, - ойла артистке.

Наталья Ивановна кажне спектакльыште модеш. Южыштыжо тудын мутшат уке, туге гынат тудо эре сценыште. “Чыла ролем йӧратем. Изи ролят мыланем шерге. “Ава шӱм” спектакль келша. Тудо модшо артистын веле огыл, ончаш толшо калыкын чонжым савыра. Пеш виян постановко, илышлан келшыше. Тиде спектакльыште мый Пӧклам модам. Драме жанр мыланем утларак келша. Комедийыште модаш, мыйын шонымаште, чылалан талант пуалтын огыл. Воштылтарен моштыман. Конешне, драме жанрын шке нелылыкше уло. Но тудо чонемлан лишыл. Кызыт “Корнывож пеледыш” у спектакльым ончыктена. Мый тушто тӱҥ героиньын аважым, Миклай ватым, модам”, — ойла тудо.

Наталья Ивановна сай артистке веле огыл, тыгак поро пелаш да ава. “Пелашем Владимир Зуевас дене студент годымак палыме лийна. Тудо шкеже Кужэҥер район Коҥганур гыч. Аваже – марий, ачаже — литовец. Ончыч БАМ-ыш чоҥаш коштыныт, пелашемын аважымат колтеныт. Тушто тудо Литва гыч самырык каче дене палыме лийын. Вашла йӧратен шынденыт, ешым чумыреныт.

Владимир дене кок ӱдырым ончен-куштена. Кугуракше, Юлита, синхронный иймашке коштеш. Ятыр медальже уло, икымше верым эреак, манаш лиеш, сеҥен налеш. 10 классыш куснен. А изиракше, Юана, спорт гимнастике дене заниматла. 5-ше классыште тунемеш. Кок ӱдыремат марла мураш йӧрата. Юлитан икмыняр мурыжо Марий Эл радиошто йоҥга. Ешыште марла кутырена. Пырля пӱртӱс лоҥгаште канаш йӧратена.

Ача дене авам мемнам моштен воспитатленыт. Мый шкежат икшывем-влакым тыгак туныктем, илыш корнышто пеҥгыдын шогышт манын шонем”, — каласыш ава.

Кораблевмыт еш дене кугешнаш лиеш. Марий шӱлышан, поро кумылан улыт. Наталья Ивановнан аваже, ила ыле гын ачажат, икшывыже да уныкаже-влак дене кугешнен кертеш. Наталья – артистке, Людмила мурым сера, Дина пьесым возкалаш йӧрата, Ольга Башкирийыште тӱҥалтыш класслам туныкта. Надежда – предприниматель. Ака-шӱжар-влак ваш йӧратат, полшен шогат. Тиде пиал огыл мо?

Самырык годым оксам ыштен, тӱрлӧ кӱлеш-оккӱлым налнена, тидлан вийнам огына чамане. А вет илышыште эн тӱҥжӧ — тазалык. Кызыт чылан таза лийышт манын шонем. Ӱдырем-влаклан кӱшыл образованийым пуынем. Кугуракше военный лийнеже, изиракше — ветеринар. Тек нунын шонымашышт шукталтеш. Мылам кокымшо шансым пуат гын, чыла шотыштат тиде корнымак ойырем ыле”, — ойла уста артистке, ӱшанле ака, ӱдыр, поро пелаш да ава.

Поро еҥын шонымашыже каваште, маныт. Тугеже Н.Кораблеван чыла шукталтшаш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: