"Талвий" рубрик, 2014 ий, Сорла тылзын 15-ше кечыже

Портрет жанр утларак келша

Статьян авторжо Анастасия Эманова

Ойлат: илыме курымышто тӱрлыжат лиеда, тидыже шкенжын койыш-шоктыш, могай пашам ыштыме гыч лектын шога маныт. Параньга район Кугу Пумарий ялын эргыже Сергей Митрофанович Попов тидын дене келша. Тудын мутшо почеш, кеч-могай ситуацийыште айдеме айдемак кодшаш, шкем ондалыман огыл.

Параньга Район Матародо кыдалаш школын завучшо, туныктышо, спортсмен, сӱретче Сергей Митрофанович ПоповСергей Митрофанович – проста еҥ. Шыман кутыра, уто шомакым ойлаш ок йӧрате. Туныктышо, очыни, тыгаяк лийшаш. С.М.Попов — Матародо кыдалаш школ директорын туныктымо паша шотышто алмаштышыже. “Шочмо ялыштем школым тунем пытаренам. Школ деч вара политехнический институтыш радиотехнический факультетыш тунемаш пураш шоненам, но конкурс пеш кугу лийын — кертын омыл. Садлан ик ий ялыште, строительный бригадыште пашам ыштенам. А вара МарГУ-со физике да математике факультетыш тунемаш пуренам. Дипломым кидыш налмеке, Матародо школыш физике ден математикым туныкташ толынам. Кызыт завуч улам. Паша шуко, тӱрлӧ шӧрыным авалта. Тӱрлӧ пашам ямдылыман, эскерен шогыман, чыла вере шуктыман. Пашаш эрденак толам да вич шагатлан веле каем. Эн ончыч ӱдыремым йочасад гыч налам, вара веле мӧҥгӧ. Ватем — умылышо пелаш. Кок икшывым куштена. Эргына нылымше классыш вончен. Изирак озанлыкна уло. Еш дене пӱртӱс лоҥгаште канаш йӧратена. Мый шкеже спортым пагалем, садлан икшывем-влакымат спорт деке кумылаҥдем”, - ойла туныктышо.

Сергей Митрофанович тӱрлӧ конкурсышто мастарлыкшым ончыкташ эреак тырша. Ятыр наградыже уло. А вич ий ончыч образований министерстве тудым грамот дене палемден.

Туныктышын яра жапше укеат, манаш лиеш, туге гынат С.М.Попов чон-кумыл пашажлан жапым эре муэш. “Изинек таза илыш-йӱлам кучаш тыршем. Шахматым йӧратем, спортын ты видше уш-акылым пӱсемда. Футбол дене модам, куржталыштам, а телым ече дене кошташ йӧратем. Мыйын шонымаште, спорт айдемым шуара, спорт дене заниматлыше еҥ капкыл куштылгылыкым, кӧргӧ вийым шижеш. Школышто тунеммем годым дзюдо дене заниматленам, эсогыл спорт мастерыш кандидат лийынам, - ойла спортсмен.

С.М.Попов тыгак сылнылык тӱням йӧрата. Гитар дене шоктен мошта. Ялыште клуб пеленсе “Чон оҥгыр” мурышо да куштышо ансамбльыш коштеш. Талын кушта. Ансамбль концертым ончыкта, районлашкат лектеда. Тӱрлӧ конкурсышто мастарлыкшым ончыкта.

Сергей Митрофанович устан сӱретла. “Юмо тыгай усталыкым пуэн. Сӱретлаш нигушто профессионально тунемын омыл. Школ деч вара художественный училищыш тунемаш пураш шоненам ыле, но илыш корно вес могырым савыралын. Кызыт чон йодмо почеш сӱретлем. Портрет жанр утларак келша. Пашам-влакым тӱрлӧ конкурсыш колтем. Каласыман, портрет жанр ала-молан чотшак огеш аклалт. Еҥым сӱретлыме годым тудын тӱжвал сынжым веле огыл, кӧргӧ шижмашыжым, шонымашыжым умылаш да альбомышто ончыкташ тыршем”, — манеш С.М.Попов.

Матародо школышто пашам ыштыше ура шӱм-чонан пӧръеҥым коллегыже-влак пагалат. Тудо завуч семын веле огыл, йолташ семынат полыш кидым шуяш эре ямде.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: