"Сылнылык тӱня" рубрик, 2014 ий, Идым тылзын 24-ше кечыже

Гармонь сем тудым мураш да кушташ таратен

Статьян авторжо Анастасия Эманова

Муро, ныжыл семже дене чоным авалтен, ала-кушкат наҥгаен кертеш. Марий эстрадыштына шагал огыл мурызо уло. Профессионал мурызо-влакын кажныжын — шке стильже. Тидыже кумылым нӧлта, вет нуно тӱҥалше мурызо-влаклан эн сай туныктышо улыт. У лӱм-влак шочмо эре куандара. Тугеже марий сем ок йом, утларак тӱзлана веле. Муро аланым пойдарымаште Татьяна Фоминыхын надырже уло. Тудо калыклан “Ош каваште” мурыж дене палыме.

Мурызо Татьяна ФоминыхСамырык ӱдыр У Торъял район Токтарсола ялеш шочын-кушкын. Аваже — соцпашаеҥ, коча-кова-шамычлан полша, ачаже тора велыш пашам ышташ коштеш. Танян Сергей изаже, Надя акаже да Саша ден Давид шольыжо-влак улыт. Саша ден Давидым йочапӧрт гыч ешышкышт кок ий ончыч налыныт. “Ешыштына чыланат музык деке шӱман улына. Мураш-кушташ йӧратена. Мый изинек мурем, кӱсле дене шоктем. Нылымше класс марте Токтарсоласе школышто тунемынам. Икымше класс гычак кӱсле дене шокташ тӱҥалынам. Кӱслезе ансамбльна шуко конкурсышто мастарлыкшым ончыктен. Кӱсле дене шоктымо годым чыла ойгым мондем. Ныжыл семже чонышто куан тулым ылыжта. Мыйын кугезе кочам Николай Артемьевич Артемьев кӱсле дене устан шоктен. Тудо кажне пайремыште вучымо уна лийын, - ойла Таня. — А кушташ да мураш ныл ияшак тӱҥалынам. Гармонь семым колам веле ыле, йолем шкеак тавалташ ӱжын. Тунам Анатолий Куклинын творчествыжым поснак йӧратенам. “Шӱмсем пӧлек” передачым шӱм вургыжын вученам. Паленам: тудын такмакше-влакым колтат. Но кунам мурызым ончыктен огытыл, моткоч шортам ыле”.

Уста ӱдыр нылымше класс деч вара Йошкар-Оласе национальный президент школыш тунемаш пура. Тушто кӱсле дене шокташ келгынрак туныктат, вокал мастарлыкшым вияҥда. Кызыт И.С.Палантай лӱмеш тӱвыра да сымыктыш колледжысе калык семӱзгар творчестве пӧлкаште нылымше курсышто тунемеш. “Тунемаш оҥай. Мый “Чинчывий” кӱслезе ансамбльыш коштам. Художественный вуйлатышына — Марина Альбертовна Эльтемерова. Тудо шукылан туныктен. Мыланна, студент-влаклан, кокымшо ава гаяк лийын. Кӱслезе ансамбльна тӱрлӧ вере усталыкшым ончыктен. Петрозаводскышто, Москошто да моло олаштат лийынна. Колледж шуаралташ, ойырымо специальностьышто вияҥаш чыла йӧным пуа. Тыште мый балалайке, домр, баян дене шокташ тунемынам”, — манеш самырык мурызо.

Татьяна Фоминыхын “Теле садыште” икымше мурыжо икымше курсышто тунеммыж годым шочын. Семым да шомакым Александр Мамаев возен. “Икымше мурем мыланем чинче падыраш гай, моткоч аклем да йӧратем. Тудым шуко концертыште муренам. Лачак тиде муро дене мурызо семын шочынам, манаш лиеш. Муро аланыште шумо кӱкшыт нерген ойлаш эр шонем. Мый але тунемам веле. Туге гынат икте раш: ончыкылык илышем музык дене кылдем. Лишыл жапыште калык ончыко “Улат шӱмыштем” у муро дене лекташ шонем. Мутшо да семже – Аксарын, - ойла Т.Фоминых. — Шуко мурызо дене кылым кучаш тыршем. Аделина Батаева дене кугу йолташ улына. Вашла эре полшена, каҥашым йодына. Дуэт дене мураш кумыл уло”.

Ош каваште

Ош каваште чоҥештен,
Кайыккомбо-влак лӱшкат,
Сылне верлан тауштен,
Йӱкланен чеверласат.
Нуным ужын йывыртен,
Мый вуем нӧлтем каваш
Да шке семын шоналтем:
Каенат тыят тораш.

Припев:
Шӱлышем тылат колтем
Кайыккомбо-влак пелен
Шонымемжым ойлымемжым
Шӱмыштем гына кодем (2 гана).

Тӱтыра гай шаланен,
Жап эртен кая тыгак.
Умыр касым шарналтен,
Ом керт монден тачат.
Тек ойлат тыгай лиеш
Йӧратет да мондалтеш,
Но тыге илаш молан
Йӧраташ да курымлан.

Припев.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: