"Сылнылык тӱня" рубрик, 2014 ий, Идым тылзын 1-ше кечыже

Ешыштыже музыкым йӧратат

Статьян авторжо Анастасия Эманова

Самырык мурызо Алина Макарован шӱшпык йӱкшым пытартыш жапыште Марий Эл радиошто чӱчкыдын колаш лиеш. “Йӧратем”, “Ах, шӱмбелем” да моло мурыжым колыштын, чоным романтизм шӱлыш авалта, кумыл нӧлталтеш.

Самырык мурызо, МарГУ-н студенткыже Алина МакароваАлина Волжский район Руш Шайра ялеш шочын. Марий сем тӱня тудым ондакак сымыстарен. “Ешыштына чыланат музыкальный улына. Ачам моткоч сылнын мурен да гармоньым шоктен. Чаманен каласыман, ӱмыржӧ вучыдымын кӱрылтын. Авам шкет мыйым да шольымым йол ӱмбак шогалтен. Авамат – уста мурызо. Шке жапыштыже ача дене коктын районлаште концертыште муреныт, шуко сӱаным сӧрастареныт. Авамын могырым Юрий кочам яндар йӱкан лийын, тӱмырым кырен”, — ойла мурызо.

А.Макарова изинек чолга кушкын. Сотнур кыдалаш школышто тунеммыж годым сылнымут кружокыш коштын, спорт дене пеҥгыде кылым кучен, сайын тунемын. “Школышто мураш, почеламутым возкалаш тӱҥалынам. Муро, сылнымут конкурслаште чӱчкыдын участвоватленам. Ятыр гана призовой верым налынам. Урокышкат кумылын коштынам. Туныктышына-влак мемнам шинчымашым налаш, у кӱкшытыш шуаш кумылаҥден шогеныт. Лачак тиде мемнам Моско марте конден. Технологийым туныктышо Надежда Николаевна Войконован вуйлатымыж почеш пырля тунемме ӱдыр Наташа Михайлова дене “Ландшафтный дизайн и архитектура” проектым ямдыленна да тудым Москошто араленна. Проектна эн сайлан шотлалтын – икымше верым налынна. 2012 ийыште “Молодой лидер” республикысе конкурсышто призовой верыш лектынам. Олимпиадыште шинчымашем эреак тергенам. Химий, географий, руш литератур да моло предмет дене ямдылалтынам, но марий йылме утларак келшен. Шочмо йылмым куанен тунемам, ик гана веле огыл районысо олимпиадыште икымше верым налын, республикысе конкурсыштат участвоватленам.

Спортым йӧратем, но тудлан жапым шагал ойырем, Саша шольым дене пырля кеҥежым южгунам куржталам. Тудо тале спортсмен, ятыр грамотшо да медальже улыт”, — манеш ӱдыр.

Алинан талантшым Шайра клуб вуйлатыше В.В.Харитонов ужын да “Рвезе сем” ансамбльыш ӱжын. “Владимир Васильевич ден Елена Валерьяновна моткоч уста улыт, нуно шукылан туныктеныт, музык аланыште келге шинчымашым пуэныт, — ойла мурызо. — “Изи шулдыр” мурым йӧратем. Тудым эше Анна Османова мурен. Мый икмыняр муремлан шке мутым возенам. Икымше тыгай муро — “Йӧратем”. Семже — Александр Отвагинын. Кокымшо муремат йӧратымаш нерген — “Ах, шӱмбелем” маналтеш. Семжым Отвагинак келыштарен.

Критикым эре шотыш налам. Изинек мурем гынат, профессионал мурызо омыл. Кӱчык жап Татьяна Денисован студийышкыже коштынам. Тудо кумылаҥдыше шомакым ойлен. Тыгай сай акым Валерий Дмитриевич Кульшетов пуэн. Тидыже поснак куандара. Марий эстрадыштына шуко оҥай да уста мурызо уло. Светлана Строганован, Эльвира Токташеван да Артур Ефремовын творчествышт келша”.

Кызыт Алина – Марий кугыжаныш университетысе Национальный культур да межкультурный коммуникаций институтын студенткыже. Кокымшо курсыш вончен. Марий йылме ден литератур да англичан йылме туныктышо лияш ямдылалтеш. Ӱдыр университетыштат чолга. “Голос юности” фестивальыште мастарлыкшым ончыктен. Тунеммаште ончылно лияш тырша. “Мый оптимист улам. Пӱрымашлан ӱшанем. Нимо так ок ышталт, шонем”, - манеш Алина.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: