"Кугарнягудо" рубрик, 2014 ий, Шыжа тылзын 24-ше кечыже

Иканаште икмыняр рольым модыт

Статьян авторжо Анастасия Эманова

Театрын сценыштыже могай гына образ ок шоч, могай гына илыш ситуаций ок ончыкталт. Спектакльым ончаш толшо шукочс еҥ геройын койыш-шоктышыжо, илышыж гыч шкенжым ужеш. Театр – воштончыш. Тудо шкенам умылаш полша, ӧрдыж гыч могай улмынам, а южгунам тӱрлӧ ситуаций гыч лекташ чын корнымат ончыкта.

"Жак и его слуга, или Как стать Людоедом" спектакль гыч фотоТеатр тӱрлӧ уло, но тудын ик эн тӱҥ цельже – шӱм-чоным тарваташ, шонаш тараташ. Тидым Курчак театр моткоч сайын шуктен шога. Вет тушто кугыеҥлан веле огыл, но эн ончыч йоча-шамычлан спектакльым ончыктат, а тиде эшеат неле.

Театрын репертуарже оҥай. А “Жак и его слуга, или Как стать Людоедом” постановкыжым эн виянлан шотлем. Ик гана ончымаште чыла раш шонет, тыгодым ала-могай тайным шижат. Спектакльым Шарль Перрон произведенийже негызеш дель арте комедий, але маске комедий жанрыште шындыме.

Постановкышто ончыкталтеш, кузе його, опкын койышлан кӧра айдеме осал Людоедыш савырна. Тӱрлӧ маске, курчак, шуко весела мыскара да муро ончаш толшо-влакын чоныштым тарватат, нуно икмыняр жаплан йомак тӱняш логалыт.

“Жак и его слуга, или как стать Людоедом” спектакльыште шуко образ уло, но нуным ныл актёр веле модеш. Ик образ гыч весыш куснаш кугу мастарлыкан лийман. Тыгай уста еҥ улыт Максим Белецкий, Роман Дербенев, Анна Деркач ден Евгений Сорокин. Актер-влакын спектакль, образышт нерген шонымашыштым палаш кумыл лектын. Чаманен каласыман, вашлиймаште Евгений Сорокин (Руш драме театрын актёржо) уке ыле, гастрольышто лийын.

Тиде спектакль йоча-шамычланат, кугыеҥ-влакланат оҥай. Икшыве “Кот в сапогах” йомакым пален налеш, а кугыеҥ шке койыш-шоктышыж нерген шоналта”, — ойлат актёр-влак.

Анна Деркач Люций пырысым модешКажне артист кум-ныл рольым модын. Р.Дербенев, мутлан, Ачан, Корольын, Ирмузын да Кроликын образыштым чоҥен, М.Белецкий Изан, маркиз Блюдолизын, Ирмузын, Кроликын, кресаньыкын, оролын рольыштым модын, Е.Сорокин Жакын, Людоедын, оролын рольыштым, а Анна Деркач — Изан, принцессын, Люций пырысын рольыштым. Палемдыман: тений курчак театр “Театральный Йошкар-Ола” фестивальыште “Жак и его слуга, или Как стать Людоедом” спектакльым ончыктен. Тушто А.Деркач “Курчак театрыште эн сай роль” номинацийыште Люций пырысым устан модмыж дене сеҥышыш лектын.

Ты спектакль – маске комедий, тиде куандара да пашанам изиш куштылемда. Туге гынат образым тичмаш шижын от мошто гын, геройын койыш-шоктышыжым почаш неле. Кажне образ, кеч осал персонаж, мыланна шерге да йӧратыме, спектакльыш ме чоннам пыштена, молан-гынат йочам туныкташ тыршена”, - манеш М.Белецкий.

Герой-влакым ончыктымаште кугу рольым костюм модеш. Ирина Мартынцева мыланна тувырым кӱчык жапыште вашталтен чикта. Мутлан, Аня пырысын рольжо гыч иканаште, манаш лиеш, принцессан рольжым модаш тӱҥалеш. Кулисе шеҥгек кая, тушто Ирина Аням писын чикта да ик минутат уке, кулисын вес могыржо гыч принцессе лектеш”, - ойла Р.Дербенев.

Тиде спектакльым театрыште веле огыл, школлаштат ончыктат. “Тоштерыште йӱд” мероприятийыште, олан кечынже, школлаште ончыктенна. У полатыште 29 октябрьыште лиеш. Ончыкшым тиде спектакль дене гастрольыш вес олашкат лекташ шонена. Спектакльна куаным кондыжо манын тыршена”, — Анна Деркач мутланымашке ушныш. "Жак и его слуга, или Как стать Людоедом" спектакль гыч ужаш

Курчак театрын актёржо-влак спектакльыште модмышт годым йоча-влак дене мутланат, нунын шонымашыштым йодыт. Тидыже постановкым эшеат оҥайым ышта.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: