"Рубрик деч посна", 2014 ий, Шыжа тылзын 10-шо кечыже

Икымше туныктышем

Статьян авторжо Эльвира Терентьева

033

Илышыште икымше туныктышо поснак шерге. Лач тыгай еҥ — Провой кундемысе Красногорский 2-шо №-ан школышто тӱҥалтыш класслаште туныктышо да завуч Н.В.Новосёлова — дене палдарыме шуэш.

Нина Валериевна Провой кундем Янашбеляк ялеш шочын-кушкын. Аваже, Зинаида Михайловна, «Звениговский» совхозышто ветеринарлан пашам ыштен, а ачаже, Валерий Геннадьевич, водительлан тырша.

Икымше гыч латикымше класс марте 2-шо №-ан Красногорский школышто шинчымашым поген. Шкенжым чолга, сайын тунемше ÿдыр семын ончыктен. Классыште командир улмаш. Йӧратыме предметше-влак — руш йылме ден музыка. Йылмызе лияш шонен.

Урок-влак деч посна школысо хорыш мураш коштын (музыкальный вуйлатышыже — Наталья Фёдоровна Софонова), шке мастарлыкшым «Пампалче» конкурсышто терген. А эше тудо ургаш йӧратен, садлан вургемым ургымо да шулымо кружокыш коштын. Ты сомыллан Анжелика Аркадьевна Матюкова туныктен. Нина ургымо коллекцийжым моло тунемшыланат ончыктен.

1998 ийыште И.К.Глушков лӱмеш Оршанке педколледжыш тунемаш пура. Тушто тунеммыж годым ӱдыр шкенжым сай могыр гыч гына ончыктен, чыла конкурсышто мастарлыкшым терген. А 2002 ийыште шочмо 2-шо №-ан Красногорский школыш географий да ОБЖ-м туныктышылан толын.

Икмыняр ий пашам ыштымеке, Нина Валериевна паша вержым вашталтен. Тиде жапыштак Озаҥ оласе институтым юристлан йошкар диплом дене пытарен.

Жап эртымеке, шӱм-чон йодмо почеш Нина Валериевна 2-шо номеран Красногорский школыш тӱҥалтыш классысе туныктышылан пашам ышташ пӧртылеш. Тудлан вигак икымше классым ӱшанен пуат.

Мый, тудын тунемшыже, сай пашажым раш ужам: йоча-влакат самырык туныктышым йӧратат да пагалат, мӧҥгысӧ паша деч посна иктат огеш кошт, кеч-могай класс деч ӧрдыж пашамат пырля ышташ тыршат. Нина Валериевнан мутшо почеш, эн тӱҥжӧ – паша коллективым пагалымаш, йоча-влакын умылымашышт, сайын тунеммашышт.

Туныктышына — поро, ушан, еҥым умылен, чаманен, йӧратен, пагален моштышо. Тудо мыйым да моло тунемшымат сай койышлан гына кумылаҥден: чын верч шогаш, илышыште пеҥгыдын ончыко ошкылшо айдеме да кеч-могай пашаштат ару лияш таратен.

Икымше туныктышына класснам походышко ятыр гана коштыктен. Каналтыме жапыштат да модмо годымат тудо мемнам илышлан ямдылен шога: кеч-куштат эре чыным кычалеш, мо улмым весе дене пайлаш туныкта. Шке деч изиракым але ӱҥышыракым игылташ огыл, а мӧҥгешла, тудын дене кылым кучаш да кертме семын пыдал налаш. Ме икымше класс гычак икте-весынам пагалаш, чаманаш, йӧсӧ годым полшаш тунемынна. Класс деч ӧрдыжсӧ мероприятий да труд урок годым моштымынам пайдалын кучылташ туныкта. «Кеч-можат илышыште кӱлеш лийын кертеш», — ойла поро чонан туныктышем.

2012 ий гыч икымше туныктышына тӱҥалтыш классласе завучлан пашам ышта. Тудо кеч-могай пашаштат эре ончылно каяш тырша. Тыршымыж нерген тӱрлӧ кӱкшытан ятыр грамот ден диплом палдарат. Мыят Нина Валериевна деч примерым налам, тудын гаяк лийнем!

Дмитрий Малтаков,

3 класс.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: