"Рубрик деч посна", 2014 ий, Шыжа тылзын 31-ше кечыже

Вепсла, рушла, карелла, финнла модыт

Статьян авторжо Ирина Степанова

Veps“Майатул” фестивальыште кок весела ӱдыр дене палыме лийна. Вепс ӱдыр Сандра Анискина ден карел ӱдыр Анни Кондракова Петрозаводскышто илат да Карелий Республикысе национальный театрыште вич ий наре актерлан пашам ыштат.
Йолташ ӱдыр-влак пырля Карелийысе тӱвыра ден сымыктыш колледжым тунем лектыныт да ты театрыш толыныт.
“Вепс-влак кажне ийын шагалемыт. Ты йылме дене утларакше шоҥго-влак кутырат. Ондак мыят вепсла моштен омыл, рушла гына мутланенам, кеч ковам-кочам вепс лийыныт. Кызыт ынде ты ситыдымашым пытарем, вепсла шке семынем тунемам да спектакльыштат ты йылме дене модам”, — ойла Сандра. Ӱдыр Карелийыште тыгак – палыме радиовӱдышӧ.
Анни денат тыгак. Тудат жапше годым рушла гына кутырен, кеч мӧҥгыштышт карел йылме чӱчкыдын йоҥген, ӱдыр шкежат икмыняр шомакым пален. Шочмо йылмым тудо келгынрак колледжыште тунемаш тӱҥалын. “Жалке, таче карелла лач шоҥгырак-влак да яллаште гына кутырат. Йоча-шамыч рушла веле мутланат. А школлаште лач финно-угор класслаште веле шочмо йылме дене туныктат”, — палемдыш ӱдыр.
Ты актрисе-влакым кок ий гыч черетан “Майатул” фестивальыште вучаш тӱҥалына. Тудо уэш Йошкар-Олаште лиеш.
Ирина Степанова.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: