"Рубрик деч посна", 2014 ий, Шыжа тылзын 31-ше кечыже

Кок гана «Орлёнокышто» канен

Статьян авторжо Эльвира Терентьева

Аня Куприяшкина Аня Купр технология добраАнна Куприяшкина (снимкыште) Курыкмарий районысо Эман школышто 11-ше классыште шинчымашым пога. Тиде чолга ӱдыр 7-8-ше класслаште школысо «Дюна» ушемын председательже лийын, а тений тудым Кугурак класс-влак ушем вуйлатышылан сайленыт.

Аня кӱсле дене моткоч сайын шокта. Кодшо арнян тудо «Финн-угор транзит: йоча жапысе пайрем» фестивальыш толын ыле. Мастарлыкшым школысо «Ныжга сем» да районысо кӱслезе-влак ансамбльлаште ончыкта. Тудо Микрак селасе Владислав Куприянов лӱмеш йоча музыкальный школын Эман школысо филиалжым «Кӱсле» классшым тунем лектын. «Ныжга сем» ансамбль республикысе, регионысо да тӱнямбал конкурслаште выступатлен да сеҥыше радамыш лектын. Теве тений идалык тӱҥалтыште Чебоксарыште эртыше «Палитра талантов» тӱнямбал конкурс-фестиваль гыч III степенян диплом дене пӧртылын. Тунам самырык кӱслезе-влакым «Радуга жизни» тӱнямбал проектын финалышкыже ӱжыныт. Тыге ансамбльын индеш еҥже 16 гыч 24 июнь марте Сочи олаште лийын да «Звёздная планета» детско-юношеский тӱнямбал фестивальыште участвоватлен. Тушто «Ныжга сем» I степенян лауреат лӱмым сулен налын.

Аня эше Сарапай тӱвыра да каныме рӱдерысе «Шанавыл» фольклор ансамбльыш коштеш. Сентябрьыште ты ансамбль дене пырля Ульяновск олаште эртыше «Свадьба в Обломовке» тӱнямбал конкурсыш миен. Сӱан йӱлам ончыктымыж дене «Шанавыл» II степенян дипломант лийын.

Чолга тунемшым школыштыжо аклат, сандене Аня Шем теҥыз воктенсе йоча лагерьыште кок гана канен. 2011 ийыште Эман школын командыже «Я гражданин России» социальный проект почеш эртыше акцийын финалистше лийын. А ты конкурс Российысе «Орлёнок» йоча рӱдерыште эртаралтын. Тыгак тунемше-влак педагогышт Л.В.Куприяшкина дене пырля «Яндар остановко — селан чурийже» проектым ямдыленыт да илышыш шыҥдареныт. Тидлан Эман селаште илыше вич ӱдыр — Аня Куприяшкина, Мария Багрова, Таня Зотина, Таня Шонгина, Мария Ситникова — педагогышт дене пырля тиде проектым араленат да тыгодымак Шем теҥыз воктене каналтеныт. «Ӱдыр-шамыч дене чыла пашам шке вийна дене шуктенна, — ойлыш директорын воспитататлыме паша шотышто алмаштышыже, географийым туныктышо Л.В.Куприяшкина, — остановкым чиялтеныт, теҥгылым келыштареныт, уверлан стендым пижыктеныт. Ынде остановкым «шефствыш» налынна, воктенже кажне шошым да кеҥежым шӱкым кораҥдена, тӱсшым волгалтарена. «Орлёнокышто» каналтенна веле огыл, социальный проектым чын возаш да илышыш шыҥдараш тунемынна».

А 2013 ий ноябрьыште Аням республикысе школ-влакын активист тӱшкашкышт пуртеныт. Тыге ӱдыр Анапа олаште «Смена» федеральный йоча рӱдерыште лийын да «Будущее начинается сегодня» йоча да молодёжный активым погымаште тыршен.

Тений мартыште Курыкмарий районышто «Акпарс мландын шӱдыржӧ-влак» шоу программыште участвоватлымыже эшеат куанле лийын. Тыгак «КРАВЕЦ: Культура, Россия, Активность, Величие, Единство, Целостность» лӱман I молодёжный республиканский культурно-исторический форумышто участвоватлен. Тудым Курыкмарийысе самырык-влакын инициативный группышт организовален. А майыште Аня Куприяшкина «Технология добра» республикысе конкурс-проектыште «Пропаганда здорового образа жизни» направлений дене сеҥышыш лектын. Тыгай молодeц ӱдыр ила Эман селаште. Кӧ лияш шонымыжым таче раш каласен ок керт, тӱвыра дене кылдалтше профессийым ойырен налнеже.

Эльвира Терентьева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: