"Рубрик деч посна", 2014 ий, Шыжа тылзын 10-шо кечыже

“Корнывож пеледыш”

Статьян авторжо Эльвира Терентьева

Тыгай спектакль дене 9 октябрьыште Марий самырык театр шке тургымжым почо. Тудым «Марий ТЮЗ-ын сценыштыже самырык марий драматургий» проект кышкарыште ончыкташ палемдыме ыле.

Пьесым Марий радиошто ятыр жап журналистлан пашам ыштыше Дина Кораблёва возен. Такшым тудын ик пашажым – легенде негызеш возалтше “Оно эҥер тӱҥалтыште”пьесыж почеш спектакльым — Марий тӱвыра рӱдер модын ончыктен ыле. “Чылаже ныл пьесем уло, — каласыш Дина Ивановна. — “Корнывож пеледышыже” эн ончыч возалтын. Сылнымут произведенийыште ӱдырамашын неле илышыже ончыкталтеш. Но шуко неле-йӧсым чытен, сеҥен лекташ тудо вийым муэш. Йолташ ӱдыржӧ туддеч кая гынат, шӱм-чон лукыштыжо порылыклан кугу вер уло. Тиде пашам дене каласынем: марий ӱдырамашым нимогай нелылык огеш чактаре, ончыкылык ӱшан дене ила. Марий ӱдырамаш — виян айдеме”. Пьесын тӱҥ героиньыжым пелашыже кудалтен кая. Вара ӱдырамаш рак дене черлана. Тудлан тӧрланаш изи эргыже полша, корнывожышто кушшо пуракаҥше пеледышым поген конда да аважлан пӧлекла. Пеледыш да йоча — илышын эрласе кечыже. “Ава илышаш, шке эргыжым йолымбак шогалтышаш. Перегыза шке тазалыкдам, ава-шамыч”, — тидымат каласынеже пьесын авторжо.

Тӱҥ рольым Анжела Мамаева чоҥен. 12 октябрьыште тудым Клара Аникина модеш.  Эргыжым Александр Кожевников келыштарен. Героинян аважын рольжым Наталья Кораблёвалан ӱшаненыт.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: