"Улам мый Рве-зы-лык!" рубрик, 2014 ий, Шыжа тылзын 31-ше кечыже

Нигунам ит шӱлыкаҥ, ончыко кай!

Статьян авторжо Эльвира Терентьева

DwdUC50PIc0Нигунам ит шӱлыкаҥ, ончыко кай!

Тыгай девиз дене ила марий ӱдыр Регина Пудова (снимкыште). А такшым шкеж нерген ямдылыме презентацийжым “Илыш – тиде куан” манын лӱмден. Ӱдыр чолга улмыж дене ойыртемалтеш, санденак, очыни, тудын куанжат, сеҥымашыжат ятыр. Туддене уло школ кугешна.

Кужэҥер районысо Руш Шой школышто 9-ше классыште тунемше Регина Пудова нерген каласкалаш эше теве вес кугу амал уло. Тудо кодшо ийын “Идалыкын тунемшыже” конкурсышто “Идалыкын спортсменже” номинаций дене сеҥышыш лектын. Шочынжо тудо тиде районысо Шӱдымарий ялыште, вара ешыже Руш Шойышко илаш куснен. Регина тысе “Золушка” йочасадыш куанен коштын. Ӱдыр физкультурым моткоч йӧрата, санденак спортын тӱрлӧ видше дене сеҥымашыжат шагал огыл. Тылеч посна алгебрым, геометрийым, физикым, черченийым, искусство предмет-влакым жапла. Яра жапым спортлан, оҥай сылнымутым лудаш да йолташ-влак дене иквереш пайдале пашам ышташ, тӱрлӧ темылан кутыраш ойыра.

Шкем тӱрлӧ могырым вияҥдымаште ешын кугу полышыжо шижалтеш. “Eшемым кугу ор семын палемден кертам, вет тушто мыйым аралат, пагалат, жаплат да эре полшат, — каласыш Регина. — Ачам, Михаил Алексеевич, машинистлан пашам ышта. Мӧҥгыштӧ улеш гын, сурт-оралтыште эре ала-мом ачала, чоҥа, сӧрастара. Авам, Валентина Анатольевна, Руш Шойысо ВУС-ын (военно-учётный стол) инспекторжылан тырша. Моткочак пидаш йӧрата. Кристина акам – Приволжский кугыжаныш технический университетысе строительный факультетын студенткыже. А изи Ванюшна “Золушка” йочасадышке коштеш. Туддене пырля модына, мультфильмым ончена. Ме келшен да икте-весым умылен, йӧратен, пагален илена. Мый шке ешемым йӧратем!

Кызыт Регинан ик эн тӱҥ пашаже — тунеммаш, санденак отметкыжат “5” ден “4” гына улыт. А вара кӱшыл шинчымашым налаш вузыш пураш шона, кызыт профессийым ойырен налаш манын, ятыр шонкала, шуко лудеш, кычалеш. Сеҥымашыж дене палдарыме годым эн ончычак математика дене Россий кӱкшытыштӧ эртаралтше “Кенгуру”, руш йылме дене “Русский медвежонок” конкурс-модышлашке кажне ийын ушнымыжым каласыман. Тыгак физкультура дене республикысе олимпиадыште участвоватлымыжым палемдыман.

Эше тудлан туризм оҥай. Тыште тудо шкенжым ынде кумшо ий терга. Кызыт тидлан Руш Шой школын директоржо А.Э.Репин кумылаҥда. “Туризм – тиде спорт веле огыл, а эше пӱртӱс лоҥгаште лиймаш да чонлан келшыше сомыл. Тудо мыйым ответственный лияш, дисциплиным кучаш, пӱртӱсым перегаш, арурак лияш туныкта”, — ойла спортсменка. Кодшо ийын Регина Пудова Туризмын тӱнямбал кечыжлан пӧлеклалтше “Роза ветров” кокымшо фестивальыште “Висячий городок” манме таҥасымаште икымше верым налын. Кодшо телым ече туризм дене республикысе ӱчашымаште Руш Шой школын ныл еҥан командыже икымше лийын, Регина дене пырля Алексей Лебин, Дима Сабанцев, Андрей Мошкин участвоватленыт. Марий Эл Республикысе спорт министерствын икымше верым пуымо грамотшат уло. Тудат спортивный туризм шотышто ече дене 14-15 ияш ӱдыр-влак коклаште эн писе улмыжым пеҥгыдемда. Вес диплом тӱшка денат палыме лийым – туштыжо Россий МЧС министрын кидпалыже ыле – “Школ лӱдыкшыдымылык” Россий кӱкшытан XII таҥасымаш гыч кондымо. Награде-влакым тӱрлӧ дисциплине дене ончыл верым налмыжлан кучыктеныт, икымше верже — “Кычалме да утарыме паша” дене. Медальже гын кажне таҥасымаш деч вара ешаралт шога.

Эн кугу сеҥымашлан шкеже “Ава лиймаш да йоча тӱня, еш кугыжаныш йымалне” манме республик кӱкшытан йоча сӱрет конкурсышто икымше верым да “Йоча тӱня чек деч посна” XI тӱнямбал фестивальыште “Ме аклена – ме пагалена” конкурсышто кокымшо верым налмыжым шотла.

Йолташыже-влакат тудым аклат. “Регина — чыла нелылыкым сеҥен, ончыко кайыше айдеме. Тудын семын пьедесталыште чӱчкыдынак шогышо мемнан тукымнан пеҥгыде эҥертышыже лийыт”, — каласыш тудын нерген Иван Головин. А Ольга Романова тудым сай йолташ ӱдырлан шотла да илышыште тудо ятыр сеҥымашке шуэш манеш. Тидлан шочмо школжат, районжат да республикшат ӱшанат. Лач ӱшан дене ончыко каяш куштылгырак. Тек Регинан корныжо волгыдо лиеш.

Эльвира Ендылетова.

Фотом еш альбом гыч налме.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: