"Шинчымаш кугорнышто" рубрик, 2014 ий, Шыжа тылзын 24-ше кечыже

Тыште шукылан тунемыт

Статьян авторжо Анастасия Эманова

Звенигово район Памашсола (Керебеляк) тӱҥ школ писатель Осмин Йыванын лӱмжым нумалеш. Школ директорын сомылжым ынде вич ий Морко район Алсола ялын шочшыжо Владислав Варсонофьевич Алексеев шукта. Шке жапыштыже Азъял школым тунем пытарен.

Школышто тунеммыж годым точный науко деке шӱмаҥын. МарГУ-со физике да математике факультетыш тунемаш пурен. Тыге илышыжым туныктышын профессийже дене кылда. Дипломым кидыш налмеке, Кокласола кыдалаш школышко толеш. Тушто вич ий физикым да математикым туныкта. Вара илыш корно тудым Шӱргыял кыдалаш школыш конда. Изиш лиймеке, Памашсола школышто туныкташ тӱҥалеш. Ынде тушто 19 ий тырша.

Керебеляк тӱҥ школын директоржо Владислав Варсонофьевич АлексеевШколна моткоч чапле, кугу. Ончыч 200 утла тунемше лийын гын, кызыт 53 йоча веле коштеш. Тений кандаш икшыве икымше классыш толын. Вес ийын шукемшаш. Школ пелен йочасад уло. Кок группым чумырымо. Чылаже 30 икшыве тушко коштеш. Йоча-влаклан тунемашышт чыла йӧным ыштена. Класс-влакым арун кучена. Школ пелен сылне сад-пакча, фонтан улыт. Ынде кок ий почела район администраций школ кумдыкым тӱзатымылан грамотым кучыктен. Коллектив икоян, умылышо, чылаже 27 пашаеҥ. Конешне, нелылыкат уло. Эн кугужо – школ леведышым олмыктыман, — ойла директор. — Школышто чапле спортзал, компьютер класс улыт. Урокышто презентацийым ончыктымо годым у интерактивный доскам кучылтына. Тӱрлӧ кружок пашам ышта. Иктыже — “Родничок” — келге шонымашан, моткоч кӱлешан занятий. Тудым Арын черкын социальный пашаеҥже Сергей Иванович Алексеев эртара. Йоча-влакым Юмо деке лишемда, ласка чон дене илаш, ваш пагалаш да йӧраташ туныкта”.

Школышто шке пашаштым палыше, кугу профессионал-влак туныктат. Теве Валентина Ивановна Пушкина 26 ий марий йылме ден литературым туныктышылан ышта. Ты селаштак шочын-кушкын, тунемын. Н.К.Крупская лӱмеш Марий пединститутым тунем пытарен. Студент пагытшым кызытат порын шарналта. “Институтышто тунеммем годым “Марий сем” ансамбльыште муренам да куштенам. Концерт дене республикнан чыла районыштыжо лийынна. Тора кундемымат ужаш пиал шыргыжалын, Мордовийыште, Карелийыште марий калыкын мастарлыкшым ончыктенна. Школ пелен “Буль-булянка” ансамбльыш коштынам, ялысе ик мероприятият ты ансамбль деч посна эртен огыл”, — ойла туныктышо.

Валентина Ивановна физкультурым туныктышо лияш шонен. Тудо писын куржталын, волейбол дене модын. Ядром кудалтымаш дене таҥасымаште эре участвоватлен. Но изаже шонымашыжым вашталтен, марий да руш йылме-влак пӧлкаш тунемаш пураш темлен. Туге гынат В.И.Пушкина спорт дене кылжым кӱрлын огыл, факультетшын чапшым тӱрлӧ таҥасымаште арален.

Валентина Ивановна — РФ-се общий образованийын почетан пашаеҥже. Тудын тунемшыже-влак шочмо йылме дене олимпиадыште шуко гана призовой верым налыныт. “Чолга, марий шӱлышан тунемшем-влак шукын улыт. Нуно школ деч вара Марий кугыжаныш университетысе марий филологий направленийым утларак ойырат.

Икшывым олимпиадыш визымше класс гычак ямдылаш тӱҥалам. Индешымше класс деч вара шукынжо Кокласола лицейыш тунемаш куснат. Но йодыш лектеш гын, мый декем эре толыт, йыҥгыртат. Мемнан школышто шочмо йылмым кок шагат туныктена, а Кокласола лицейыште — кандаш шагат”, - ойла туныктышо.

В.И.Пушкина “Краеведений” кружокым вӱда. Памашсола кундем нерген материалым шуко пога. “Йоча-влак дене материалым погаш яллаш лектына. Шуко оҥай материалым “Ончыко” журналыште муына. Кажне тылзын лу экземплярым кондат. Тыгак “Кугарня”, “Марий Эл”, “Ямде лий”, “Шӱм чон изолык” газет-влаклан подпискым ыштена”, — манеш тудо.

Школыштына мероприятий-влакым чӱчкыдын эртараш тыршена. Кажне ийын Иван Осмин лудмаш эрта. Йоча-влак кумылын ушнат, марий писательын творчествыжым пагалат да йӧратат. Шӱдӧ ияш лӱмгечыжлан апрельыште республик кӱкшытан лудмаш лиеш манын ӱшанена”, — ойла Валентина Ивановна.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: