"Ме марий улына" рубрик, 2014 ий, Кылме тылзын 7-ше кечыже

Калыкланна тазалыкым, уш-акылым пуэн шого!

Статьян авторжо Ирина Степанова

с162 ноябрьыште У Торъял район Саваран отышто Тӱня кумалтыш эртыш. Тушко кундемнан, тыгак марий-влак илыме моло вер гыч шуко еҥ погынен ыле.
Палемдена: Тӱня кумалтыш график почеш кажне ийын ик гана (южгунам шукыракат лийын кертеш) эртаралтеш да кажне гана тӱрлӧ отышто лиеш. Тӱня кумалтышым Советский район Чокмотышто, Шернур район Коклала отышто, Кужеҥэр Ош куэр отышто эртарат. Тений Саваран отышто кумалаш черет толын шуын. Тыште эрыктыме пашам эртарыме, ӱстел-влакым ямдылыме да молат. Отыш кайыме корнышто Саваран отышко кузе логалаш лиймым ончыктышо пале-влакым шогалтыме.
Отышто вич вере Юмо-шамыч лӱмеш тулолмо-влакым вераҥдыме. Калык шкаланже келшышым, чонжылан лишыл улшо верым ойырен, киндым пыштен, сортам пуэн да онаеҥ дек миен, Юмо деч тазалыкым, серлагышым пуаш йодын.
Тыге икте Кугу Шочын Ава Мланде Ава, Кугу Перке Ава деке шогалын гын, весе Мер Кугу Юмо тулотыш вашкен, кумшо Кугу Пӱршӧ, Кӱлдӧ Пӱршӧ, Эрге Пӱршӧ тулото воктене чарнен, нылымше Тӱҥ Ош Кугу Юмо, Тӱня Кугу Юмо, Кугу Серлагыш, Аҥавайрем Юмо, Илян Юмо туло воктене кумалын, визымше Поро Лемде Курык Кугу Кугыза дек шогалын. Моткоч шукын чонан дене (комбо, лудо) дене толыныт. Тӱҥ тулото воктене тыгак Юмылан тунам, шорыкым, икмыняр тагам пуэныт. Кажне тулото воктене вич але утларакат кугу подышто шылым, лемым, пучымышым шолтымо. Кумалтыш пытымеке, чылан тидым пырля авызленыт. Южышт пеленышт пырля налыныт да мӧҥгыштышт кажным тиде Юмо кӧстенеч дене сийленыт.
Толшо-влак шкаланышт, ешыштлан, уло марий калыклан пиалым, тазалыкым, вольык, окса перкем, тыныслыкым йодыныт. Онаеҥ-шамыч кумалмышт годым торашке пашаш коштшо-шамычланат, салтакыште улшо-влакланат, студент-влакланат тазалыкым да перкем йодыныт.
Ирина Степанова.
И.Речкинын фотожо.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: