"Сылнылык тӱня" рубрик, 2014 ий, Кылме тылзын 14-ше кечыже

Самырык актер “осал” рольым моднеже

Статьян авторжо Анастасия Эманова

Ожнысек театр шкешотан храмлан шотлалтеш. Спектакльыш билетым налаш черет эре кугу лийын. Театр сценыште артист-влак комедий, драме, трагедий да моло жанран спектакльлаште мастарын модыт, геройыштын шижмашыжым, илышумылымашыжым ончаш толшо-влаклан намиен шукташ тыршат. А вет нунынат илышыштышт тӱрлӧ неле ситуаций лиеда, кумылыштат вола. Туге гынат тидым сценыште нуно огыт ончыкто. Тидыже — эн кугу мастарлык. Театрыште модмым кино дене таҥастараш ок лий. Вет киношто иктаж мутым мондет гын, вес дубльым сниматлаш лиеш. А театрыште чыла раш ойлыман, кугу аудиторий ончылно модман. Калык ӱшаныже манын, актёр-влак чоныштым пыштат, ӱнарыштым огыт чамане. Г.Константинов лӱмеш Руш драмтеатрын самырык актёржо Ярослав Ефремов нерген лач тыге манаш лиеш.

Г.Константинов лӱмеш Руш драмтеатрын актёржо Ярослав Ефремов ("Убийца" спектакль гыч фото) Ярослав изинекак театрыште модаш шонен. Тудын аваже Ирина Ефремова мурызо, РМЭ-н сулло артисткыже, эргыжын тыгай кумылжылан тореш лийын огыл.

Ярослав Йошкар-Олаште шочын-кушкын. Кок классым 9-ше №-ан школышто тунемын, индешымше класс марте — Бауманский лицейыште, а вара мӧҥгеш шочмо школышкыжо пӧртылын. 9-ше №-ан школышто КВН командыште модын, драмкружокыш коштын. Икымше гана “Моцарт и Сальери” спектакльыште Моцартым модын.

Школ деч вара рвезе И.С.Палантай лӱмеш тӱвыра да сымыктыш колледжыш тунемаш пура. Студент годымак пырля тунемше йолташыже-влак дене Г.Константинов лӱмеш театрыште модын. А 2011 ий гыч театрыште пашам ышташ тӱҥалын. “Икымше ролем массовкышто “Дама-невидимка” спектакльыште лийын. Тудым Санкт-Петербург гыч режиссер Андрей Лапиков шынден. Роль изи гынат, чонлан шерге. Тыгай уста режиссер дене пашам ыштымаш — сай опыт. Мастарлыкым кажне у спектакльыште вияҥдаш тыршем. Айдеме ӱмыржӧ мучко молан-гынат тунемеш. Ойырен налме профессийыште шкенам вияҥдышаш улына, тунам веле профессионал семын кушкына, — ойла актер. — Икымше кугу пашам “Солдатики” спектакльыште лийын. Тушто мый Новиковын рольжым модынам. Спектакльым Угарман гыч актер, режиссер, педагог, Российын сулло артистше Александр Борисович Сучков шынден. Тиде спектакльыште модмылан Игорь Новоселов дене пырля (тудо Хрустяшиным модын) ӱмаште “Мост дружбы” фестивальыште “Эн сай сценический дуэт” номинацийыште сеҥенна, мыйым жюри тыгак “Надежда театра” спецприз дене палемден. Тидлан моткоч куаненам.

Театрна шуко олаш гастроль дене коштеш. Вес сценыште модаш оҥай. Моло артист дене кылым кучашак тыршена. Лениногорск, Стерлитамак, Нижнекамск олалаште, эсогыл Эстонийын рӱдолаже — Таллинныште — спектакль-влакым ончыктенна”

Тений Руш драмтеатрын кум артистше “Убийца” спектакльыште модмылан Олык Ипай лӱмеш премийлан темлалтын. Нунын коклаште Ярослав Ефремоват уло. Тудо ты постановкышто Андрейын рольжым модын. Палемдыман: тиде образым мастарын чоҥымыжлан “Театральный Йошкар-Ола” фестивальыште рвезе “Эн сай пӧръеҥ роль” номинацийыште сеҥышыш лектын. “Мыйын героем – неле ситуацийыш логалше 19 ияш рвезе. Тудо картла шуко модын колтен. Неле ситуацийым шкет сеҥен ок керт, ала-мо деч эре лӱдеш, чын поступкым ыштен ок керт, садлан Юмылан кумалаш тӱҥалеш, молитвам лудеш, полышым йодеш. Юмылан ӱшанымаш героемлан, ик могырым, полша, но йӧратымаш илышумылымашыжым вашталта, тудан кӧргӧ вийым пуа. Лачак йӧратымаш верч тудо чын поступкым ышта”, - манеш Я.Ефремов.

Ярославлан режиссер-влак сай койыш-шоктышан герой-влакым модаш ӱшанат. Садлан самырык актёр “осал” рольым моднеже. “Кажне актер кеч-могай рольым модмыж годым персонажшым умылаш тырша, тудым чыныш лукнеже, вет герой могай-гынат осал пашам таклан ок ыште, тидлан ала-могай амалже уло, шукыж годым неле пӱрымашлан кӧра айдеме титакыш пурен кая. Тидым ме ончаш толшо-влаклан спектакльна гоч умылтараш тыршена. Залыште шинчыше-влак, ӧрдыж гыч ончен, чыла тидым ужеш да умыла манын ӱшанем,” — ойла актёр.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: