"Рубрик деч посна", 2014 ий, Кылме тылзын 28-ше кечыже

У ФАП – у йӧн

Статьян авторжо Эльвира Терентьева

Республикысе яллаште медицине тӧнежым чоҥат да пашаш колтат. Ондак медпункт иктаж пӧртыштӧ изи верым айлен гын, кызыт фельдшер-акушер пунктым чоҥымылан кӧра еҥ-влак “Мемнан дене цивилизаций!” куанен ойлат. Но, очыни, чыла ФАП-ыштак ончылгоч палемдыме оборудований уке, южо вере специалист-влак огыт сите. А такшым черле еҥым райрӱдысӧ больнице семынак посна кабинетыште ончаш да тӱрлӧ аппарат дене тергаш сай йӧн ышталтын.

Волжский район Корамас кундемыш мийыме годым верысе ФАП-ым куанен шымлен лекна. Тушто мемнам З.И.Семёнова ден В.Л.Покровская вашлийыч. Кабинет-влакым ончыктыльыч, мо-кузежым радамлен пуышт. Тыгай полатыште у йӧнлан эҥертен пашам ыштыман. У оборудованийын кузе пашам ыштымыже, тыгак лӱмынак тунем толашышт логалын.

Прививкым ышташ, сусырым пидаш, медицине ӱзгар-влакым стерилизоватлаш посна кабинет-влакым ойырымо. Мӱшкыран-влакымат посна кабинетыште ончат. Тушко кушеткым, медицине пашаеҥын ӱстембалжым да ӱзгарым оптымо посна ӱстелым, электрон висам вераҥдыме ыле. Вес вере – физиокабинетыште — кок тӱрлӧ физиолеченийым эрташ, ЭКГ-ым ышташ аппарат-влак шогат. Черле еҥым кварц полшымо дене эмлаш лиеш, пылышлан ондакысе “Солюкс” лампым эн сайлан шотлат. Физиокабинетыште тӱрлӧ пашам шукташ эше икмыняр оборудований шотышто тунеммашышт верештеш.

Корамас ФАП-ыште кумытын тыршат: вуйлатышылан Зинаида Ильинична ынде 28 ий пашам ышта, Валентина Леонидовна Покровская — патронаж медшӱжар, Людмила Викторовна Степанова — санитарке. “Пашана, ик могырым, куштылемын, вес могырым ешаралтын. Теве ончыч коҥгам олтен иленна, южгунамже шикшан пӧлемыште шинченна, сандене медицина картычке ден моло документат шемем пытеныт ыле. Ындыжым газым пуртымо, котёлым шындыме. Газпуч почеш толшо шокшым пуышо агрегат-влакын кузе пашам ыштымыж нерген Волжскысо горгаз гыч специалист-шамыч кумыньнамат туныктен кодышт. А теве кызыт Йошкар-Олаште “Ялысе калыкым аралымаш” теме дене курсышко коштам. Вара мылам ты темым эртыше акушер улмым пеҥгыдемдыше документым — сертификатым — кучыктат ”, — каласыш З.И.Семёнова.

Корамас кундемыште калык шагалжак огыл. Чылаже 1300 еҥ ила, тышеч 230 — латкандаш ияш марте йоча. Патронаж медшӱжар шочшо азан тазалыкше верч тургыжлана. Тений тыште латкок аза шочын.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: