"Рубрик деч посна", 2014 ий, Кылме тылзын 28-ше кечыже

Эн чолга, эн-эн… улыт

Статьян авторжо Эльвира Терентьева

IMG_4209Эн чолга, эн-эн… улыт

Йошкар-Оласе 29-ше №-ан школышто “Наше время” йоча организаций 2005 ийыште шочын. Вес ийын пионервожатый Л.А.Бобик тудым вуйлаташ толын. Тунам староста-влакын советышт семын лийын. Лариса Анатольевна ты пашам вестӱрлемдаш да икмыняр направлений почеш посна отрядым ышташ темлен.

Йоча мер организаций-влак пашаштым тӱрлӧ могырым вияҥдат. Нуно творческий личностьым, элнан чын гражданинжым кушташ, лидер качествым шочыкташ, таза илыш-йӱлам кучаш, патриот шӱлышеш кушкаш да шуаралташ полшат. Сай лектышыш шуаш манын,“Наше время” организаций “Милосердие”, “Я хочу, я могу, я имею право”, “Древо жизни” да моло программышке ушнен.

5-11 класслаште тунемше-шамычлан, ийготыштым ончен, тӱрлӧ кӱкшытан корно темлалтеш. 5-ше классыш коштшо икшыве-влакым (ондак 4-ше класс лийын) йоча организацийыш кажне ийын 19 майыште – Пионерийын шочмо кечынже – пуртат. Ынде куд ий почела ты кечын йоча ушем ӱжарам вашлияш лектеш. Икымше ийын организацийыш ушнышо-влак пашам кузе ыштымыж нерген пален налыт, вес гана могай отрядыш кайышашым палемдат. Вара мом ужмо-колмыштым, шинчымашыштым оласе конкурс ден мероприятийлаште терген, активист радамышке логалын кертыт. Кажне йочан ик-кок ий гыч лидер лияш да иктаж отрядым вуйлаташ йӧнжӧ уло. Мо оҥайже: 11 классым тунем лекше ӱдыр-рвезе-влак устав почеш ты организацийыште умбакыжымат пашам ыштен кертыт.

Отрядлаште паша шолеш

Корнысо изи инспектор-влак. Ты отряд корнысо правилым шуктымо шотышто агитацийым эртарымашлан вуйын шога. Отрядыш коштшо-влак конкурсым, викториным да моло мероприятийым организоватлат. Агитбригадым чумырымышт поснак куандара. Тӱҥалтыш класслашке, йочасадыш, Республикысе йоча эмлымверыш миен коштыныт, корнысо правилым умылтареныт, пашам оҥайын ончыктеныт.

Ончыклык лидер-влакын школышт. Тышке 7-8 класслаште тунемше ӱдыр-рвезе-влак коштыт. Нуно тӱҥалтыш классласе да йочасадласе икшыве-влакым модыктымо, илышын тӱрлӧ уда да сай шӧрынжӧ нерген каласкалыше программе почеш пашам ыштат. Тыгак лидер-влакын оласе конкурслаште шке мастарлыкыштым ончыктат. Ты программым кажне шошо каныш годым фестиваль семын ола воктенсе иктаж школышто ончыктымаш йӱлашке пурен.

Волонтёр-влакын клубышт. Тышке коштшо йоча-шамыч таза илыш-йӱлалан кумылаҥдат, тӱрлӧ спорт мероприятийым шонен луктыт. Кодшо ийын нуно “Ачай-авай да мый – спортивный еш” конкурс, “Йоча да подростко – виян патыр он” мероприятий да “Шкаланет ӱшане” фестивальым эртареныт. Волонтёр-влак, оласе фестивальыште шуко уым тунем толмеке, чыла тидым 6-7 класслаште тунемше-шамычлан каласкаленыт.

ТВИКС (творческая интересная команда старшеклассников). Тышке тӱрлӧ классла гыч творчество шӱлышан йоча-влак погыненыт. Нуно чӱчкыдынак рӱдолаште эртаралтше мероприятийыш ушнат, шкеак программым ямдылат. Шке школыштышт изирак класслаште тунемше-влакын активыштым тӱшка погынымашыш чумырат, тӱрлӧ теме дене мутланат, мастер-классым ончыктат. Ноябрьыште ТВИКС 5-ше класслаште тунемше-шамычлан “Кузе чолга лияш” мероприятийым эртарен. Тыште йоча организаций нерген каласкаленыт, модыныт, мурым тунемыныт.

Модына канен” проект

ТВИКС отрядыш ныл чолга ӱдыр коштеш. Нуно 11 классыште тунемыт. Кум ий ончыч нуно “Мый Российын гражданинже улам” проектым ямдыленыт ыле. А школыштына тиде паша “Модына канен” маналтын. Оласе да республикысе конкурслаште икымше верым налын да Российысе таҥасымашкат миеныт. “Тӱҥалтыш класслаште тунемше-влак переменыште кычкырлен ынышт куржтал манын, коридор кӱварыште классикым, моло модышым сӱретлен пуэныт. Кызытат йоча-шамыч тушто модыт, — каласкала Лариса Анатольевна. — Тиде проектым тений майыште шуенна. Эн ончыч Республикысе йоча эмлымвер воктенысе асфальтыштат, варажым школ кудывечысе яра площадкыштат нине модышым сӱретленна. Вет кундемнан тӱрлӧ лукшо гыч эмлалтше йоча-влак деке ача-авашт ден родышт чӱчкыдынак толын каен огыт керт, сандене илышыштым изишак веселаҥденна. Йоча кеҥеж лагерьыштат тиде сай модыш лийын”.

“Наше время” йоча организаций шке символжо-влакым – ужар тӱсан галстукым, эмблемым, флагым – пеҥгыдемден. Девизшат шкешотан да сайын йоҥгалтше:

“Ме весела, келшен илыше да виян улына.

Мом йодыда – чыла тыланда шуктена.

Ме ондакысе тукым гыч огынал,

Ме “Мемнан жапысе” йоча улына”.

2014 ийыште “Наше время” йоча организацийым республикыште эн сайын пашам ыштышылан шотлымо да кубокым кучыктымо. Тидын нерген школ коридорышто кечыше стенд пеҥгыдемда. Тушто тенийысе конкурслаште чыла вере гаяк икымше вер дене палемдалтмышт вигак шинчалан перныш. Тугеже йоча-влак чолга кушкыт, жапым пайдалын эртарат. Тыге ӱдыр-рвезе-влаклан илышыште тӱрлӧ кӱкшытыш шуаш корно почылтеш.

Эльвира Терентьева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: