"Ме марий улына" рубрик, 2014 ий, Теле тылзын 5-ше кечыже

Коча-кова олаште илат, йоча-шамыч — ялыште

Статьян авторжо Ирина Ямбаршева

Es30 ноябрьыште, Аван кечынже, Ижевскыште илыше национальный еш-влакын “Еш шонанпыл” конкурс-фестивальышт лийын. Тудым Ижевскыште илыше марий-влакын “Ижевск Мари” мер организацийышт» эртарен.
Фестиваль-конкурсыш латкок национальный еш ушнен: удмурт (кум еш), руш, марий, татар, украин, армян, азербайджан, мордва, еврей, белорус. Марий еш лӱм дене Князевмыт выступатленыт.
Эн ончыч жюри еш-влак фотографиян стендым аклен. Тушто еш илыш моторлык, шке йӱла, тукым кыл дене палдареныт. Тыгак шке кид дене ыштыме тӱрлӧ арверым луктыныт, национальный кочкышыштым темленыт. Кажне еш, шке национальный костюмым чиен, сценыште выступатлен, визитный картычкым ямдылен да мӧҥгӧ пашам – художественный самодеятельность номерым – ончыктен.
Ижевскысе национальный мер ушем-влакын художественный самодеятельность коллективышт выступатлыше тӱрлӧ национальностян еш-шамычлан полшеныт – номерым ончыктеныт. Князевмыт еш дене пырля “Ош пеледыш” марла мурышо да куштышо ансамбль мастарлыкшым ончыктен. Ансамбль “Кермыч коҥга” композицийым ямдылен. Князевмыт “Шуко шочшан еш” номинацийыште палемдалтыныт.
Ӱдыр-влакым ялыш марлан пуэныт
Князевмыт Ижевск олаште илат. Зоя Сергеевна — марий ӱдырамаш. Тудо Малопургинский районысо Поби ялеш шочын. Ӱмыржӧ мучко малярлан ыштен. Кызыт сулен налме канышыште. Туге гынат мӧҥгыштӧ огеш шинче, эмлымверыште санитаркылан ышта. Марийже, Ипполит Сергеевич, — национальностьшо дене одо. «Кок ӱдырым ончен-куштенна. Когыньыштымат шке ялышкем марий эрге-влаклан марлан пуэнна. Кугурак ӱдырна, Елена, Старомоньинский тӱвыра пӧртыштӧ методистлан ышта. Школышто да Поби ялыште йоча-влакым кушташ туныкта, тӱрлӧ мероприятийыш коштыт. 2009 ийыште Йошкар-Олаш Пеледыш пайремыш миеныт ыле. Пелашыже, Олег Петров, кӱртньыгорнышто бригадирлан тырша. Куанем: келшен илат, у, чапле пӧртым чоҥен шынденыт. Ныл ӱдырым ончен-куштат. Аня Ижевскысе педколледжыште воспитательлан тунемеш, Даша – Удмурт кугыжаныш университетын МЧС факультетыштыже. Элиза 5-ше классыш коштеш. А эн изи Василиса ӱдырыштлан кок ий веле. Тудым ончаш ковашт Мария Сергеевна полша.
Кокымшо ӱдырна, Ольга, сурт коклаште шогылтеш. Марийже, Гавриил Дмитриев, кӱртньыгорно станцийыште ышта. Кум ӱдырым ончен куштат. Кугурак ӱдырышт, Настя, Ижевскысе педколледжыште тунемеш. Юлия 8-ше классыш коштеш, а эн изи Карина ӱдырыштлан — куд ий.
Уныкам-влак чыланат ансамбльыш коштыт. Марла пеш сайын ойлен огыт мошто, но мутланымым чыла умылат. Марла мураш да кушташ йӧратат.
Ижевскыште тунемше кугу уныкана-влак пеленна илат. Мый шкеже «Ош пеледыш» ансамбльыш коштам. Пидаш, ургаш йӧратем, концертлык костюм-влакым чыла шке ургем, ӱдыремын ансамбльжыланат ямдылем. Почеламутым серкалем. Пакчана уло. Тушто утларакше пелашем шогылтеш. Тудо тыгак колым кучаш, поҥгым погаш йӧрата.
Юмылан тау, авам, Дарья Степановна Тайметова, пеленнак. Тудо 93 ияш, Поби ялыштак шӱжарем дене пырля ила. Авам деч ожно кузе илыме, мом чийыме нерген йодыштам, муро-влакым серен налам», — палдарыш ешыж дене Зоя Сергеевна.
Теве тыгай марий еш ила Одо кундемыште. «Тӱрлӧ марий пайремым эртарена, кугезе йӱлам огына мондо. Марий сыным йомдараш огына шоно», — манеш З.Князева.

Фото – еш альбом гыч.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: