"Рубрик деч посна", 2014 ий, Теле тылзын 16-шо кечыже

“Шнуй пӱртӱс вер”

Статьян авторжо Эльвира Терентьева

Пундашдыме памаш Шӱвырзын кумалмыже

Тыгай фотоконкурсым Эстонийысе Maavalla koda обществе шымше гана эртарыш. Тушко 11 эл гыч фотографий толын. Нунын кокла гыч пелыштыже Россий ден Финляндийыште илыше финн-угор калык-влакын шнуй верлаштым ончыктымо.

Тӱҥ премий – 1000 евро – тений Эстонийыштак кодын (ӱмаште тудо Марий кундем гыч Сергей Таныгинлан логалын ыле). Эн сай пашалан Яанно Лойденын “Пундашдыме памаш” снимкыжым шотлымо. Тиде памаш Сааремаа отросо Пяхкла ял воктене верланен. 200 евроаш молодёжный премий Таллинн гыч 12 ияш ӱдырлан – Эммелийне Калвиклан — логалын. Снимкым “Шийым кӧргычмаш” манме да памашшинчам почмо лӱмеш шийым кӧргычмӧ акрет годсо йӱлам ончыктымо. Фотошто – Финляндийысе Янаккала шнуй отысо Лаури памашшинча. 300 евроаш премий дене Удмуртий гыч Анастасия Сидорова палемдалтын. Тудын “Акташ отышто кумалмаш” манме фотожым “Родо-тукым калык-влакын шнуй пӱртӱс верышт” номинаций дене аклыме. Ош куэр 2

Чылаже 21 премий пуалтын. Марий Эл гыч “Йӱла-влак” номинацийыште Сергей Таныгинын “Ош куэр. Шнуй ото” снимкыжым палемденыт. Тушто Кужэҥер районысо Нурсола воктенсе Ош куэрыште эртыше кумалмашым ончыктымо. Волжский район Руш Шайра гыч Иван Богомоловын “Шӱвырзын кумалмашыже” фотопашажым “Кӱсотын ойгыжо” категорий дене акленыт. Тыгак “Вӱдавалан пӧлеклымаш” снимкыже “Поянлык” категорий дене палемдалтын. Эстонийысе национальный тоштер ныл премийым пуэн. Кокымшо премий – адакат Сергей Таныгинын(!) — “Ош куэр. Шнуй ото” вес фотожлан.

Ош куэрСаламлена! Марий-влак, тиде конкурс ынде йӱлашке пурен. Шнуй вер нерген сай качестван фотода уло гын, снимкысе вер нерген кӱчыкын войзалтыза да вес ийын конкурсышко ушныза. Тудо сентябрьыште увертаралтеш. Кумылда веле лийже.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: