"Рубрик деч посна", 2014 ий, Теле тылзын 5-ше кечыже

Статьян авторжо Эльвира Терентьева

Мустайыште лийже рай! Шернур районысо Мустай школ лӱмлӧ марий писатель Шабдар Осыпын лӱмжым 1991 ий годсек нумалеш. Школ ончылно писательын бюстшо толшо-кайыше еҥым ты вер дене кугешнаш тарата. “Помыжалт, марий!” да “Йывырте!” почеламутшо-влак ятыр марий еҥын шӱм-чонжым тарватен докан. Тыгодым Шкетанын возымыжымат ушештарынем: «Шемер марийым, марий поэт ден писатель-влакым шочмо пÿртÿсым алал кумыл дене йöраташ И.А.Шабдар туныктен”. Меат, кугарнязе-влак, куанышна: тыште марий койышым арален кодымо да шочмо йылме дене мутланыме, тудым кумда тӱняшке вожылде шарыме паша кмбакыже шуйна. Пагалыме да лӱмлӧ еҥ радамыш писатель, историк-этнограф Ким Васиным, марий поэт Антонов Ивукым, Н.Крупская лӱмеш МГПИ-н профессоржо Д.Е.Казанцевым, 1-ше №-ан Национальный президентский сымыктыш школын ончычсо директоржо Г.Д.Пряниковым, РФ-н сулло артисткыже М.Е.Медиковам, опытан хирург О.Т.Токтауловым, палыме сӱретче Н.В.Токтауловым пуртена да ончыкыжымат тиде радам ешаралт толеш манын ӱшанена. 2011 ий годсек школым Людмила Георгиевна Глушкова вуйлата. Школ пелен 2007 ийыште йочасадым почмо, медпункт ышта. Кок пачашан кермыч полатыште 60 веран кочмывер, 288 квадратный метр кумдыкан спортзал, библиотекарь, музей, актовый зал верланеныт. 17 еҥан педагог коллектив моткоч келшен ила, тидымак пеҥгыдемден школын лӱмгечыжлан ямдылалтмашат. Тидлан оргкомитетым чумыреныт, вуйлаташ ты школышто 31 ий йоча-влакым туныктышо, ятыр пайремлан сценарийым возышо Людмила Ивановна Медведевалан ӱшаненыт. Ик туныктышо хорым чумырен, весе куштымашым шынден, кумшо фотографий-влакым кычалын, стендым ыштен, нылымше презентацийым ямдылен, историйымат шымленыт, стендлан иктаж-мом конденыт… Лӱмлӧ выпускник-влак нерген каласкалыше брошюрым ямдыленыт. Икманаш, чыланат уло кумылын полшеныт. “Пайремышке утларакше шоҥго-шамыч толыныт. Кажныже шомакым ойлаш йодын. Мыйын шонымаште, иктымат ойырен ышна кодо. А торжественный ужаш деч вара ӱстембал йыр шинчын мутланенна, муренна, куштенна. Чылаже 100 наре уна толын”, — каласыш Л.И.Медведева. Школышто тӱрлӧ куштымашын вияҥмыже куандара. Ондак нуно, тӱрлӧ марий тувырым, ош блузко ден шем юбкым чиен, шке мастарлыкыштым ончыктеныт. А тений икшыве-шамыч, ача-авашт дене пырля кевытыште куэмым налын, икгай сӧрал костюм-влакым ургыктеныт. Моткоч моторын сценыште койыт, могай гына куштымашым огыт пале – ончет да ӧрат! Эсогыл руш йоча-влакат марла тавалтат! А тидлан икшыве-шамычым Мустай школым шӧртньӧ медаль дене тунем пытарыше, куштышо ик ансамбльыш коштшо, кызыт МарГУ-н кок факультетшын студенткыже Надежда Шабалина туныктен. 2011-2014 ийлаште марий йылмым вияҥдыме, йоча-влаклан марий калык йӱла дене палдарыме шотышто экспериментальный площадке пашам ыштен. Кажне класс иктаж-могай пайремым ойырен налын да тудым школышто модын ончыктен. Тыгодым тунемше-влакын шинчымашыштат, чолгалыкыштат ешаралтеш. Мустай школ шке шонымашышкыже икшырымын шуын толеш, шке ончылан шындыме задачыже-влакым шукта. Моло тунемме вер семынак шымлымаш пашам эртарат да туддене калык ончылно выступатлен мошташ туныктат. Спортлан кугу тӱткыш ойыралтеш. Моло семынат икшыве-влакым шуарат. Тидыже опытан педагог-влакын тыршымышт нерген ойла.

Школ директор Л.Г.Глушкова:

- Школыштына 2010 ий годсек математике ден физикым келгын тунемыт. Тыгак ме 10-11 классласе ӱдыр-рвезе-влакым овощеводлан туныктена, свидетельствым пуэна. Практикым школ пеленсе кугу пакчаштына эртат. Теве тений ача-ава-влакын полшымышт дене кок парникым налме. Выпускникна-шамыч чыланат иктаж вере тунемаш пурат, 50-60 процентше – вузыш. Мустай школым ятыр тунемше ший да шöртньö медаль-влак дене пытарен. Кодшо ийын гына кок тунемшылан Алексей Чимаев (шöртньö) ден Вадим Казанцевлан (ший) медальым кучыктышна.

Эльвира Терентьева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: